Duhdawtnak timi hi ziang a si ti hi mithmuh theih rori dingih a langfiangtertu an um tuk lem lo. Duhdawtnak ih sullam hi a phunphun in kan sim cio. Miṭhenkhat cun duhdawtnak cu peksuahnak a si tin a sullam an simfiang. Cun miṭhenkhat in ziangvek dinhmun le thil pakhatkhat ruangah si lo in amahte ih rasuakmi a si tin an ti. A si ko. A ngaingai ti ahcun duhdawtnak cu “A sidan vek ten cohlan le lungkimpi khi a si.”
Mitampi cun nupi pasal neih tikah sunglam hnakin a lenglam hi thupi ah ret in an zoh ih nupi pasal an nei. Asinan mi hmuahhmuah cu kan si lo. Ziangah tile a fiangmi cu duhdawtnak timi cu amai’ zawn lawng a ruat lo. Himi thawn pehpar in Elo le Mara tei’ pahnih dinhmun le sinak, innsang an dindan pawl zoh tikah duhdawtnak timi hi ziangmi ciah a si ti a langfiangter nasa.
Mara timi fala hi mimawi le duhnung zetmi fala a si. Mipa zo khalih zoh khop thei lo ding tiangih mawinak famkim neitu khal a si. Elo timi tlangval cu mi niamte a si. Culawng si lo in amah le mah khal mi famkim lo ka si ti ruat-awtu khal a si. Asinan khuanui’ laireldan hi theihthiam a har kan ti ṭheu bangin Mara le Elo tei’ pahnih karlak ih duhdawtnak hi kaa ih simrel theih lo ding dinhmun ah a um.
A netnak ahcun an pahnih cu a thianghlim neihawknak thawn sunglawi zet in innsang nuam zet an din tariai. An neihawk ni ah lungawipitu le lompitu mipi pawl hmaiah atu vekin thukamnak an tuah.
Pathian hmai le mipi hmaiah Elo in hitin thukamnak a la: “Pathian hnenah thusuhnak ka tuah. Ziangruangah hivekin i sersiam. Ziangruangah hivek dinhmun i thlengter. Asinan nang (Mara) ka hmai-ih na thlen tikah Pathian hnenih thusuhnak ka tuahmi hmuahhmuah ih thulehnak cu nangmah (Mara) hi na si ti ka theifiang. A famkim lomi kei vek Elo hrangah a famkimmi Mara in pek ruangah ka lungawi tuk, Bawipa.”
A ṭheh in Mara khal cun a famkimmi minung pakhat a si lonak thu ṭongsuak in hitin thukamnak a la: “Nangmah cu nikhat hnu nikhat ka lo duh deuhdeuh ding. Kan pahnih ih duhdawtnak hnakih a tum sawnmi le a thupi sawnmi zianghman a um lo. Keimah ah famkim lonak ka nei cing ko nain sui vek rori in man nei zet ih in reh ruangah ka lungawi tuk. Na hrangah bawmtu si dingah Pathian in in sersiam a si ti hi ka zummi a si. Van ih arsi pawl lawh theinak ding hrangih kut vekin siseh, lam hlapi na feh theinak ding hrangah ke vekin siseh na kiangah ka um ringring ding. Ka kut le ka ke pawl hi nangmai’ hrangih hman dingah sersiammi le a ummi an si.”
Mara le Elo ih thukam laknak ih an ṭongsuakmi a theitu biakinn sungih mipi pawl cu an lungawi tuk ih mitthli a tla lotu an um lo ti ding khop tiangin an biang parin an mitthli a for cio. Elo le Mara ih duhdawtnak hi zoh tikah minung kan thinlung sungah a sunglawi zetmi duhdawtnak taktak a um ti hi kaa ih sim ciamco ṭul lo in a pholang nasa.
A sunglawi zetmi duhdawtnak thawn innsang dintu Elo le Mara cu Pathian in an nun lamtluan ah thlawsuah vanluhnak thawn a thuam vivo ih, atu ahcun duhnung le harhdam zetmi thlawsuah rilrah tefa Liam timi an nei.
Duhdawtnak taktak timi cu:
(1) Midang parah zawnruahnak lungput thianghlim a nei.
(2)
(3)
* (2) le (3) cu casiartu pawl in mah le theihfiangdan le tepdan cio kha thinlung thiang ten comment ngannak ah hun bet tum cio hnik uh law.
Credit: Min Thu (Daily Hot News)
Lairawn Meifar
(46/2018)
No comments:
Post a Comment