(Interview hi a sau nawn nan... a cemtiang siar sak hram aw- 2018 February ah Psychology a zir mi Final year result a suak zo ih - a Pass ih kan lungawipi zet. Atu cu a tumtahnak vekin Promotion hrangah timtuah thei zo a si. thlacamnak thawn kan bawm cio pei.)
Chin Mino tampi kan theihsun cu Bible Tlawngkai le Tlawng Saya/ma tuan/ Singpore, Malaysia, China etc.. feh ti pawl hi kan theih sun a si. Pathian ih in pekmi ka Talent/ ka thiam thei zawng hi ziang a si, Hmailam saupi hrang, ka nuntu khawsaknak hrangah zaing tuah a tha ti ruat cuca loin sumpai ka ngah cun tawk, Degree ngah cun tawk, Mirang tong thiam cun tawk ti men in Mino tampi kan um....
Q1. Zaangfahten nangmai bulpak thuhla mallai in run sim thei pei maw?
* Kan hmin cu Dong Hnem Lam a siih Kawl rualpi pawl in Mar Lar tin in ko. Pu Sa Tin Mung le Pi Khuang Tial te ih fa nauhak lam ih a pa-6-nak ka si. Unau -7 kan um. January 27/1995 ni ah Laitlang ZAWLPI khua ah ka suak. Ka Pa te ih khuahlun cu Laitlang Falam peng Saihmun a si. Kum 2000 ah ka suahnak Zawlpi khua ihsin atu ih kan umnak Taungzalar Veng, Kalaymyo ah kan um.
Q2. Na zirnaklam pawl teh in sim thei pei maw?
* 2011 kum, Kalay ah phun-10 ka ong ih, tu hi Kalay University ah Psychology in Final year ka kai rero.
* Nurse AID Training Course – 2011-12 ah ka kai, ka kainak hmun cu MYANMAR TENDR LOVE INTERNATIONAL Co., Ltd. ah as siih – HEALTH EDUCATION AND TRAINING CENTER ah a Taa-phua – Training, Nau neih lam zirnak ah ka peh.
Q3. Sunlawihnak/ hlawntlinnak lam na ngah mi pawl sung ihsin a langsar deuh pawl in run sim thei pei maw?
* 2015 – Kalay Sehvel Mr. & Miss Valentine Day ih zuam-awknak ah – 2nd runner up Prize ka ngah dah.
Q4. A lungawi um nasa. Cule Phun hra na ong hnu ah College na kai cih maw?
* Ka kai cih lo a tlun ih ka sim zo vekin kum hnih ka cawl ta, Yangon ah Nurs 8 training thla ruk ka kai hnu ah, Tahan Bethany sii khan ah kum thum leng ka tuan. Nurs ka zirnak san cu harhdamnak hi a thupizet ih kan damlo can ah mah le mah kan kilkhawi aw thei lawng si lo in, kan kiangkap ih ummi u le nau le venghnen tla kan enkawl thei ding a si. Cule phunhra ong theh veten College kai ding kha ka nauhak tuk lai thawn caan lawng um lo ding in Nusr 8 training kai kha ka nu le ka pa in tla in duhsak a si.
Q5. Na tumtahmi a tha nasa, Caan lawng lak um lo ding in na timi hi a thupi tuk mi a si. Na zirnak thu lam ah kan kir sal duakta dingih, Ziangruangah Psychology na lak duhnak san?
* Miih tuah lemlo mi hi ziang a si ti zir/thei duhmi ka siih, cule Psychology ti cu mi thinlung ruah dan le um dan kha kan zir bik ih minung pakhat kan zoh a sile ziangvek mifiam mithiam kan si hman ah an duh daan le ruah dan kan thei thiam lo a si ahcun a buaithlakzet theu ih curuangah Psychology zir hi ka duhnak san cu a si.
Q6. Na hnatuannak lam thawn pehpar in 2015 kum ihsin thok in Kalay District Office ah MYANMAR WOMAN POLICE na tuan ti kan thei ih kan lungawizet. Cutin asile Ziangruangah nunau hnatuan tha a dang tampi um lai ah himi Police hnatuan ngelcel na hril tih hi mipi kan theihduhzet mi a si, tawi famkimten in runs im thei pei maw?
* Kan Laimi Woman Police tuantu hi kan um dah vak lo, a tuantu hi pakhat hnih lawng kan si. Cule himi hnatuan hi mi tampi ih ti dah lemlo mi thil a si tikah tuan ve sin hrimhrim tla ka cak. Cun ziangsi maw thubuai pakhatkhat kan ton tikah kan Laimi cu Zunglam ihsin thusuh tivek khi kan tih, ziangah tile zung sungah kanmah Laimi hnatuantu kan um ve lo, asinanKawl pawl cun an tih ve lo, ziangahtile a sung ih hnatuantu anmah Kawl pawl lawnglawng an si. Curuangah, nehhnu ah kan tuan vivo thei ih kan hlawh- tling vivo ahcun Hotubik tla kan si thei ve ding ih, cutin Chin mi hrangah tangkainak malte ka nei ve pangah ti ruahsannak tumpi ka neih ruangih ka tuannak san tla a si.
Q7. Miphun duhdawtnak thinlun na nei ih kan lo upatzet. Cule Myanmar Woman Police na luh thok daan le cumi hrangih na pah tlang mi pawl in sim thei pei maw?
* Si, himi Police hnatuan hi a duh pohpoh in duhduh in lut a theih lo ih, Tahfung an hman mi pawl pahtlang ding tampi a um ih, Pathian zarah ka Hlawhtling vivo ruangah ka lut ngah. Kan Saan le niam, Kan thiamnak, Daan le Dun nei le nei lo, Kan Damnak lam, Ca in thusuhnak a phunphun pawl an nei ih cumi pawl ka ong theh thei.
* Si, himi Police hnatuan hi a duh pohpoh in duhduh in lut a theih lo ih, Tahfung an hman mi pawl pahtlang ding tampi a um ih, Pathian zarah ka Hlawhtling vivo ruangah ka lut ngah. Kan Saan le niam, Kan thiamnak, Daan le Dun nei le nei lo, Kan Damnak lam, Ca in thusuhnak a phunphun pawl an nei ih cumi pawl ka ong theh thei.
* Police ih lut ding Kawlram Acozah in an kawh tum ah- Kalay District (Kha-zain) ihsin mi pathum kan um ih ka rualpi pahnih pawl cu exam an ong lo ruangah an kai ngah lo. Curuangah Kalay District Level in himi tum ah keimah lawng ka si.
* 2015 ih Police kan luhtum ah Kawlram pum huap in Nunau Police –Training kaitu 1000 zik kan um ih cumi sung ihsin – kan Chin mi hi 10 hman kan kim lo. Falam nunau ah keimah lawng ka siih, Tedim – 4, Asho Chin-1, cun Christian hi kan zaten – 28 lai kan kim.
* Tulaifang Kawlram pumhuap in Nunau Palik (Ye-may) hi mipum 8000 lai kan um.
Q8. Police na lut ngah zo ih TRAINING sung ih na tonteh mi pawl, Har na ti mi le Nuam na tihmi pawl in hlawm thei pei maw?
* Hnamdang karlak ah Chin Woman Police kan um lo tikah tha a nau duhzet.
* Training sung Nitin in Zing kan thawh ihsin thok in minute -5 te hman awl/ man lak can um loin Time Table in tuahsak. Training sung ihsin thil dang pawl cu a zia um, Har ka ti bik mi cu... Arms bend (Daih-thuu) hi har ka tibik. Ziangahtile Minut 2 sung ah vei-50 in tuahter nunau hrangah cun a harzet.
* Ei-in thawh pehpar aw in zarhkhat sungah sa veihnih in pek, a dang pawl cu Arti, Pe, Tha um thei mi ei in in pek. Kan rawl ei kheng sung ih um mi hmuahhmuah cu cem ko in ei theh tengteng a tul, hlon a ngah lo. Tuhlan pawl hnak cun ei-in lam hi kan nuamzet.
* A um ko, asinan nunau hrangah cun ol lozet. Mipa hrangah cun ol deuh, Mipa cu phun-8 ong in an lak tikah experience an nei ih, nunau cu University ih second year lawng ihsin kan lut thok tikah ol lo. Cun Cathiam pawl hrangah a ol deuh.
Q10. Tu hi Women Police hna na tuan rero zo ih, hihnak ih dinhmun sang deuh ngah thei dingin University ihsin tlawng na theh le veten Bolawng Training kai peh ding tih thuhla kan thei ih, Bolawng Training na kai tum daan, Ziangtik kum in thok, Ziangruangah ti pawl inrun sim thei pei maw?
* Si, tukum 2017 hi final year ka si zo ih ka theh ih Exam ka pass ah cun, hmaikum tuvek hrawng ahcun Bolawng Training kan kai thok thei thlang ding. Ziangruangah ka kai tum a si tile, Chin mi hi mi kut tang lawnglawng ah kan um tamsawn lai ih, Mi tlun ih um thei ve ding tumtahnak thawn a si, himi Training ka kai theh ih ka ong thei ahcun Duh-Ye-UK (‘&Jtkyf ) kan si thei dingih, Duh Ye Uk kan ngah cun Ye Uk/ Ye Hmu hi cu ngah a har nawn lo. Cutin dinhmun sang ah ka um thei ve thlang ding.
Q10. Police nan si vekin Mi Kaih tul can ih na hmuh ton mi?
* Kalay District ahcun cuvek ih mi kaih tul mi an mal ih Harsatnak kan tong lemlo, Mandalay, Rangon lam sawn hi buainak, harsatnak tampi an tong theu.
Q11- Myonay a sint ah… teh nunau paziat an um.
* Myonay level ah Nunau – 4 lawng an siih… a dang cu Sakhaan ah an si. Cumi suangah Chin mi – 4 an siih kanmah Falam mi Sakhaan ih tuantu nunau palik pakhat a tel ve.
Q12. District Level ih na tuannak san?
* District level ih ka tuan theihnak san cu – himi hrangah tahfung an nei ve ih, cuih an tahfung pawl ah ka tling ve ih. An zoh mi pawl cu Ruangrai, Thiamnak, Computer skills, cun.. kan hnatuan felfai daan pawl an zoh. Tong- lampang tla thiamzet a tul ve.
Q13. Office ih Hnatuan na kaih bik mi?
-Zii-1 ( a&;-1)– department ah ka tuan ih…Police lut duh pawl Mipa/Nunau Palik lut pawl ih min cazin ka lak ih a tul daandaan in ka bawm.
* BA final year ka kai phah ih tlawng tluangten ka theh veten Camibuai – Bolawng Tindaan – a um ih cumi ah the best in ka zuam ding. Bo-khat ngahnak hrang training a siih… ngah tengteng ka tum.
* Kawlram level in – Ye-hmu-kyi level tiang ngah dingin ka zuam ding.
Q14. Miphun hrangah ziangtin tan na la ding?
* Ka hnatuan - keimah ruangah Chin level in Nunau Palik tampi an suak dingih – Hnamdang karlak ah anmah hnakih thilti thei le mi ih zohso mi Chin Police tampi an suak theinak dingin napi in ka zuam ding.
Q15. Tu cu thusuhnak dang ah kan lut ding... Fala in a siih, Mino pawl khal in an thei duhzet ding ka zum mi cu ziang a si tile, Mipa cu Nupi nei ding, Nunau cu Pasal nei ding kan si ih, tlangval hi tulai san ah a phunphun an um tikah nangmai ih thinlung sung ih um mi, tlangval na uar mi hivek sisehla tiih na ruahmi te kha… in run sim thei pei maw?
* … Aaa… cumi lam cu ka ruat lem lo… heheh … Ye-may kan tuan tikah kum cuzat sung pasal ka nei lo ding tihmi Thukamnak kan tuahta a tul, A malbik kum-3 sung ah pasal nei lo dingin… Asinan kumthum kim hlan ah pasal nei le naupai an tam tikah Thu an ruat saal ihg.. kum-2 ah an thum. Curuangah kei tla.. ka tuan hnu kum-2 a kim hnu ah thupten kan ruat leh pei cu hehehehee
Q16. Thupte in na Uar zawng mipa, pasal ding si cuangloin na nei ko dingih … in sim thei pei maw?
* Pathian tihzah, Nu le Pa, Ulenau duhdawt theitu si ko….
Q17. Nupi Pasal neih cungcang ah – Leitlun kan dam sung hrangah si tikah fimkhur a tulzet ih, himi zawn ah thu kan lo suhduh mi cu – Mah miphun kherkher neih hi tha na ti maw?
* Mah miphun kherkher cu tha ko.. asinan Khristian kan si vekin Sakhua/ biaknak dang bia pasal kan nei ih Zumtu Khristian Sakhua ih kan canter thei ding ahcun.. Thasinsin. Khristian ih canter thei lo dingah cun mahhman tlukbahnak ah a cang sawn ding.
Q18, OK.. tu cu… na Palik hnatuan lam ah kan lut sal dingih… Nangmah thawn kan tonawk thusuhnak kan neihtawk zarah Kanmah Chin mi Nunau Palik (Woman Police) tuan duh an pung vivo ding ruahsannak kan nei ih, a tuan duh, lut duh an um asile ziangtin, ziang pawl a tul.. tihmi in run sim thei pei maw?
* Awle.. ka lungawizet… Mipa siseh, Nunau siseh Police lut duh an um ahcun keimah hnenah contact a theih ringring. Atu ih ka kaih bik mi hi Cumi Police tuan duh, lut duh pawl hmin cazin latu, kaitu ka si. Kalay District Office ah ka um ih…. Nunau a si ahcun a saanlam ah pi (feet) 5.3, University kai lai, 2nd year ong cia si dingih, Kum-2 sung pasal nei a theih lo ding, Rihnak lam ah- Pound – 100 malbik a si ding, Kum lam ahcun 18-25 kar lak an si ding. A dang pawl cu kan Office an thlen hnu ah a tul daandaan in kan zoh sal.
Q19. Si… fimzirnak lam le thiamnak lam ah nangmah tawkten na hlawhtlingzet ti kan hmu ih kan lo lungawipizet, Laksawng le Sunlawihnak tete na ngahmi pawl tla kan lo lungawipizet…. ih … Nurse Aid na zirlai ah Sunlawihnak Laksawng na ngah ih cumi hrangah ziangtluk in na zuam, na taima ti pawl in sim thei pei maw?
*. Ahmaisabik ah Pathian ih thluasuah liolio a si. Ka nu le pa hi mi piangthar thlacam zuamzet an siih, an thlacam sak. Keimah ah hincun… ziangkim ka tuah hlan ah Bible ka siar theu ih… Proverb 1:7 hi ka suhzet mi Bible cang a si. Ka ti theisun cu Pathian tihzah ih tuahmi ah thabik le felbik ih tuah thei hi ka zuam.
Q20. Cule… nan innsung pawl kan zoh asile Hlawhtlinnak na ngak zuk pawl, Laksawng kengphah ih na zuk pawl tla kan hmu ih Nunau Palik na tuan hnu maw na tuanhlan ih pawl ta saw a si … ziangtik kum, zianglai ih na ngah, khuitawk ah ti pawl in run sim thei ei maw?
* 2014, February 14 ahkhan Kalaymyo ah Mr & Miss Valentine day zuamawknak a um ih cunah Second Runner Up laksawng ka ngah mi a si. Himi zuamawknak ah Kawl pawl lawnglawng an si, Laimi ah keimah lawng ka si,
Q21. Mino pawl hnenah, Laimi Christian kan si vekin hmailam kan thanso theinak ding hrangah na hmuhton mi pawl ihsin thucah in neih sak thei pei maw?
* Kanni Chin Mino pawl hi cu, Keimah ihsin thokin hna pakhatkhat kan tuan ding tikah, aaa.. khami cu a niam em mai (Standard Nei lotuk), khavek maimai tin kan tuanthok paih duh dah lo, kan Laimi sung ihsin unau Tedim pawl cu cuvek an si lo, a hmuh mi hna parah ziangvek hna te a si khal le hmailam hrang hmuhtonnak (Experience) hrangah tiin hreh mi nei loin an tuan. Cuti ih an tua reirei tikah Dinhmun sangpipi an thleng, midang pawl cu a niamte ihsin thok hmaisa hi kan duh lo..
Cuti si loin, a niamtete ihsin tangdor le thinsauten Pathian rinsan in nasak zuam in kan tuan ahcun ni khatkhat ah mi Hnatuan thahta, Mi hotu, hruaitu le dinhmun sangzet ah Pathian in in khaisang leh ding a si, ti’n ka cah duh.
Q22. Thu kan lo suh mi pawl thinsaute le famkimzet in in letsaknak parah kan lungawizet, Pathian in thluasuahnak lo pe vivo hram seh!
* Kei tla ka lungawizet.
__________________________________________
__________________________________________
Hminsin: Himi Interview-nak hi a reihlan ah Salai Star Media Youtube Channel ah famkimzet in Zuknung in zoh a theih ding a si.
Nunau Police lut duh nan um asile.. mai FB ah suthlam ringring a theih
No comments:
Post a Comment