HMINSINTLAK CONFUCIUS IH SIMMI (By-Lairawn Meifar)

Nikhat cu Tuluk mifim thuruat thiam Confucius cu lamleng ih a vah rero lai ah rinlopin mi pakhat thawn an tong aw..

A tonmipa in Confucius hnenah hitin thu a sut: “Confucius na si ti aw. Rinlopin kan tong aw ih ka lungawi tuk. Nangmah vek mifim zet thawn ton awk ding hi tuihlan ihsin ka rak caak tuk. Na khawruah thiamnak, na hmuhnak le na ṭongfim pawl in leitlunpi tiang hman tampi a thleng danglamter zo. Nangmah vek thuruat thiam, mifim le mithiam hi leitlun ah zohman ka tong dah hrih lo. Ka lo upat lawlaw si ko.” 

Asinan Confucius in cupa kha veikhatte a vun zoh ih, ziang khal ṭongsuak lo in hmailam a fehnak lamzin nuamte ten a feh vivo.

Hmun pakhat ah a thleng ih mi pakhat in Confucius hnenah hitin thu a sut lala: “Confucius an timi kha na si ko ti aw. Thuruat na thiam, na fim ih na hmin khal a thang zet nain ziang khal na si cuca cuang lo. A ngaingai ti ahcun nangmah ah ziang sinak le fimnak khal na nei lo a si hi.”

Confucius in cupa kha veikhat in a zoh ih a fehnak ding lamzin zoh in hmailam ah nuamte ten a veh vivo thotho.

Mi pahnih rori in thu an sut nain Confucius in zianghman a letsal lo tikah thusuhnak rak theitu mi pakhat in mi pahnihte ih thusuhmi thawn pehpar in theihfiang ding a caak tuk ruangah hitin thusuhnak a tuah ve.

“Ka upatmi Confucius, a hmaisa ih thu lo suttu in na khawruah thiamnak, na fimnak le na thiamnak parah a lo lungawipi, a lo lawm nasa. Asinan kam khatte hman na ṭongsuak duh lo. Cun a neta ih thu lo suttu in ziangkhal na si cuca cuang lo tin a lo hmuhsuam, a lo soisel ciamco. Asinan zianghman na sawnkir cuang lo. Ziangruangah cutin na um? Ziang na cang?”

Confucius cun tawi famkim zet ih a let ih cinken tlak zetmi ṭongfim pakhat ah a cang. “Mi ih lomnak le relsiatnak (hmuhsuamnak) pawl in kanmah ih ummi kan sinak pawl hi a niamter thei lo, cuvekin a khaisang thei cuang lo. A ngaingai ti ahcun mai’ hnaṭuanmi cio parah duhsaknak le zawnruahnak thawn a ṭha thei bik dingih tuah/ṭuan ding hi a thupi bikmi a si.”

CINKEN TLAKMI

(1) Zozo khal siseh hna a ṭuantu cun mi in in lungawipi ding, in lawm ding; cuvekin mi ih vuiphannak le soiselnak khal an tuar ding. Cucu leitlun thil umdan a si ko. Vuiphannak le soiselnak a tong dah lotu hi tuihlan ah siseh, atu khalah siseh an um lo. Hmailam khalah an um cuang lo ding. 

(2) Sakhua biaknak tinkim ih biakmi Pathian/pathian pawl hman vuiphannak le soiselnak ihsin a luatmi pakhat hman an um lo. Curuangah mai’ tuah dingmi pawl hi duhsaknak le zawnruahnak thawn thinlung zate pek ih tuah ding hi a thupi.
(3) Mi ih lomnak le soiselnak ruangah nangmah ih a ummi na sinak le na thiamnak pawl kha a hloter/niamter thei lo ti kha ciing ringring aw.

Credit: Saw Nuaih Nay Saing (Potaoo)/Lawkanite Thuta Sarpay/Wa Than
Lairawn Meifar
(35/2018)