*Thinlung Takte’n*

By Rev. Run Cung Mang

“Cutikah Keimah in ko ding. Ka hnenah ra in thla nan cam tikah ka lo theih sak ding.   In hawl dingih in hmu ding. Nan thinlung takte ih in hawl tik ahcun” (Jer. 29:12-13).

Thuhmaihruai:

Bawipa cu thinlung zohtu a si: “Milai cun a lenglam thil nan zoh, kei cun an thinlung ka zoh” (1 Sam. 16:7). Thufim 23:26 ah, “Ka fapa na thinlung takte’n i ngai aw” a ti. Mi thawn kan pehtlaih awk tikah an thinlung takte’n in pawlkom maw timi hi thupi ah kan ret cio. Cuvek in Pathian in “kan thinlung takte’n kan biak maw, kan thangtthat maw, kan rinsan maw?” ti in zoh ring2. Bible sungih “thinlung takte’n” timi zirzoi in thlarau thazaang la tlang uhsi!

1.         Thinlung takte’n Pathian hnenah kir ding

Leitlun tisa duhnak nun tlansan in A hnenah thinlung takte’n kir ding in sawm. “Bawipa ka si ti an theih duhnak ding thinlung ka pe ding. Cuticun ka minung an si dingih Kei cu an Pathian ka si ding. Ziangahtile an thinlung zate thawn Ka hnenah an kir ding a si” (Jer. 24:7). Kan milai sinak mizia cun Pathian hnen kir hnakin lei tisa duhnak ih ceen a duh sawn ttheu. Israel pawl anmah te’n Pathian hnen an kir saal thiam lo bangin kannih tla kan tisa nomceennak cun Pathian hnen ihsin in hlatter vingvo. Bawipa in, “Thil ttha lo nan tuah ringringmi pawl hi tlansan thlang uhla thinlung thar le ruahnak thar nei thlang uh” (Ezek. 18:31) a ti. Kan sualsir in thinlung takte’n Pathian hnenah kir thlang uhsi! Fapa tlanhlo cu thinlung takte’n lungsir ih a Pa hnen a kir tikah cosaan a si bangin (Luke 15), Pathian kan Pa hnenah thinlung takte’n kir uhsila thluasuah kan si ding.

2.         Thinlung takte’n Bawipa thlun ding

Zumtu cu rin-umzet in nitin Pathian umpinak dilngen ih Amah thlun ding kan si.  Bawipa in, “Ka thu famkimzet in a ngai ih, ka thupekmi thlun tahrat in ka lungkimmi lawnglawng a tuahtu ka siahhlawh David,” (1 Siangpahrang 14:8) a ti. Kannih tla David vekin Pathian lungtongtu kan si thei venak dingah thungaitu, thupek thluntu le Pathian duhmi lawnglawng hawl in a tuahtu si zuam uhsi! Bawipa in Israel mi pawl, “Nan sungah ka thlarau ka khum dingih Ka Daan pawl le ka thupekmi pawl nan thlun thei ding” (Ezekiel 36:27) a ti. Kanmai’ sinak in kan tlinh thei lo ding ti a theih ruangah Pathian in thlarau in pek (2 Tim. 1:7). Zumtu unau, tisa duhnak taansan in Pathian hnenah kir uhsila, rin-umzet in thinlung takte’n a dungthluntu si thei zuam uhsi!

3.         Thinlung takte’n Bawipa duhdawt ding

Kan Pathian cu Amah hnakih duhsawn mi neih in siang lotu thik nei Pathian a si. Moses in, “Bawipa nan Pathian cu nan thinlung zate, nan nunnak zate le nan thazaang zate in nan duhdawt pei” (Daan. 6:4-8) a ti. Jesuh in, “Milai in Pathian cu a thinlung zate le a cahnak zate thawn a duhdaw pei” a ti (Mark 12:33). Moses in Pathian lawng an duhbik ih ziangkim a sungral ngam (Hebru 11:24-26). Paul in, “Ka duhbikmi le ka hngakhlap zetmi cu ka nun ah siseh, ka thih ah siseh, ka thinlung le ka taksa zate thawn Khrih hi hmaihngalnak pe thei ningla ti hi a si,” a ti (Filipi 1:20). Ka va uar hngai ve. Zumtu unau, a hmin men Christian si loin thinlung takte’n Pathian duhdawtu, ziang dang hnakin Amah lawng a duhtu si zuam uhsi! Zumtu pitling, Khrih thlarau cu ka sungah a nung a titu cun thinlung takte’n Bawipa duhdawtnak langter ding kan si.

4.         Thinlung takte’n Bawipa rian ding 

Zumtu cu Pathian hnattuannak ah thinlung takte’n pumpe dingih kawh mi kan si. Bible in, “Bawipa nan Pathian cu duhdaw uh; a lamzin in feh uhla a thukham thlun uh; Bawipa cu hngette in pom uh; nan thinlung le nan nunnak zate thawn a hna ttuan uh” a ti (Joshua 22:5). Mai’ hlawknak ruahsan ih Pathian hnattuantu si loin in duhdawtu Pathian duhdawtnak thinlung thawn a hnattuan ding kan si. Kan nunnak hi kanmai’ taa a si nawn lo, a man pekih leimi ka si zo ti thei in, in neitu Bawipa hrang lawngah nung ding kan si. Siangpahrang Hezakiah hi Pathian ttihzah le mi dingfel, Pathian thuthlun in a miphun hrangih hnattuantu a si ruangah Pathian in thluasuah tampi a pek ti kan hmu. “Biakinn hnattuannak ah siseh, Daan thlunnak ah siseh, thinlung takte’n Pathian hnenih a pek awk ruangah a hlawhtling a si” (2 Sansiar. 31:21) a ti. Kan nunnak zate Pathian hnen ap in Khrih le miphun hrangah taimak suah in ttuan uhsi!

5.         Thinlung takte’n Pathian Ko ih Thlacam ding

Pathian in thinlung takte’n a kotu le bomnak dil ih thlacamtu lawng a let ttheu. “Keimah in ko ding. Ka hnenah ra in thla nan cam tikah ka lo theih sak ding. In hawl dingih in tong ding, nan thinlung takte’n in hawl tik ahcun” (Jer.29:13). Hanah in thinlung takte’n thla a cam ih a dilmi Bawipa in a pek (1Sam. 1:9-20). Esther le Judah mipi thinlung takte’n rawl ul in thla an cam ih luatnak an ngah. Canaan nunau nu thinlung takte’n zaangfah a dil tikah Jesuh in a duhmi a pek. Zumtu tuni Pathian kan rinnak hi ttha te’n cekfel uhsi! Kan thinlung takte’n Daniel bangin Pathian hnenah thla kan cam maw? Bawipa in, “Ka minung pawl in ka hnenah lungsir in thla an cam ih ka mithmai an hawl ahcun an thlacamnak ka theihsak dingih an sual ka ngaithiam ding,” a ti (2 Sansiar. 7:14). Kan thinlung takte’n Bawipa kan pan ahcun in hnong lo ding, in thluasuah tengteng ding.

Thunetnak:

Mi pakhat in, “Thinlung takte’n Pathian a hawltu pawl cun an tong. Amah hawl duhnak thinlung a neitu mikip hnenah Bawipa ih thulehnak a um a si,” a ti. Minung tisa daan khalah thinlung takte’n fimthiamnak le lennak a hawltu cu an hlawhtling a si. Fapa tlanhlo vekin thinlung takin Pa Pathian hnenah kir uhsi! David bangin Pathian thupek thlun uhsi! Moses le Paul bangin thinlung takte’n Bawipa duhdawt uhsi! Hezakiah bangin thinlung takte’n Bawipa rian uhsila, Hanah bangin thinlung takte’n thlacam uhsi! “Ka fa, na thinlung i pe aw” in titu Pathian cu thinlung takte’n pan thlang uhsi!