DR. ZA HLEI THANG (MIPHUN LE RAM DUHDAWTTU CHIN ARSI A ṬIL TA MAW) - By-Lairawn Meifar

A vei (3) nak Awnmawi Khawmpi ih na rak simmi thu thawn siang lo cing ten CBU in kan lo thlah a si.

Dr. Za Hlei Thang
Fredric, Maryland, USA
17 March 2017 (Zaan khawm)

A hmaisabik ah duhdawtmi Lairawn, nu le pa, u le nau, fala tlangval nan hnenah tampi ka lungawi. Lungawi thu ka lo sim.

Cule hitivek Awnmawi Khawmpi, a hleice in Pathian hmin in Pathian thangqhatnak thawn tuah thei dingih tawlreltu nan hotu pawl, nu le pa pawl, nan zate tlunah ka lungawi. Lungawi thu ka lo sim.

Cule tu hi, a ngaingai ti cun kan vuanci-pa hi ka hlanih thusim ding a si nan, ka dam lo ruangah i kian ih kan vuanci-pa hnen khalah lungawi thu ka sim.

Dam lo zet in ka ra tlawng ih, tui sun hrawng hi Falam so ding ka si nan Awnmawi Khawmpi a um ruangah, himi tikcu sunglawi zet hi tang siang lo in ka taannak a si.

Awnmawi kan ti ih, a awn…a ziangtu ha mawi? A mawitertu kha ziang a si? Awn kan ti ih thil-awn cu a tam tuk a um. Awn a phunphun a um, asinan ziangruangah awnmawi kan ti? A mawitertu kha ziang a si? ti hi kan zate in ruat tlang sehla ka duh. Hmailam khalah ruat tlang sehla ka duh.

Cule hitivek awnmawi hi leilungtlun ah hlanlai ihsin, minung semsuah ihsin mah le tawk cio in a rak um. Miphunkip in an nei. Miphun pakhat le pakhat theihthiam-awknak khal awnmawi hi hman theih a si. Tulai ahcun leilungtlun ah awnmawi hi bulpak in lennak ah, hminthannak ah an hmang bik vekin a lang. Curuangah awnmawi kan ti tikah a thupai bik cu awnmawi thawn ziangha a peh awmi? Awnmawi in tummi a nei maw? Hmuitin a nei maw? Bulpak in siseh, pawlpi in siseh, kawhhran in siseh, awnmawi kan fehpi tikanh ziangahh kan fehpi ding? Ziangha kan tumtah ? ti kha a thupi.

An run rel zo vekin kan dunglam kum (30) le kum (50) hrawngah, 1979 kum ihsin thok in Tahan ah ka ra um. Culai ahcun Tahan Bazar ahkhin kan ṭong in bazara kai a theih lo. Ziang khuitawk hmun kahlah kan ṭongin hlasak a theih lo. Kawhhran khalah hitivek hlazuamawknak khalah kan ṭong in hlasak a rak theih lo. Curuangah 1980 ihsin thok in awnmawi hi thu le hla thawn kan fehpi ahcun kan miphun hranga a ṭhahnem ding ti ruahnak thawn Salai M ka rak din.

Hitawkah pa le hrekkhat hotu pawl thawn kan rak uan ciamco. Culai kannih awnmawi kan tuah tla cu meitha ih hman sisehla cu kan buai nasa ding. Asinan awnmawi ti cu hriamhrei a tel lo ruangah poimawh zianghman um lo ten kan rak fehsuak ih, asinan khai awnmawi khan tumtahmi, fehpimi a rak neih ruangah kan mipi khalin an thei ih, tu ahcun khuitawk kawhhran khalah siseh, khuitawk hmun khalah siseh Lairawn pumpi ah kan ṭong ih ṭong tla ningzah ding a um lo. Kan thu le kan hla rel ding le sak ding khal zianghman ningzak lo ten hnangamte in kan um thei. Cucu kan rak tuahmi ih a rah sisehla.

A netabik ah awnmawi hi a ṭha kan ti ko nain a netnak ahcun miburpi le pawl le kawhhran hnakin mimal taksa ah a tla ringring ih, hlasak thiam siseh, awnmawi tum thiam siseh an hmin a thang, mi in an zohso, an lar. Curuagnah a netabik ah cun bulpak siatralnak ah a thleng ṭheu.

Curuangah tuizan ah ka lo cah duhmi cu: Atu vekin awnmawi khawmpi hlunghlai zet in puai kan tuah hi a ṭha tuk. Cuitlun ah Pathian hmin in le biaknak kawhhran ih hohanak in, huaihotnak in hivek kan tuah hi kannih Laimi hrangah a ṭha sinsin. Ziangahtile Pathian hmin in, Pathian thawn hna kan ṭuan tikah Pathian khal a sunglawi. Milai pawl khal kan lungawi. Siatralnak ihsin khalin in humhim thei. Curuangah hmailam ah bulpak in siseh, hohatu pawl siseh kan ralring dingih Pathian hmin in tuvekih kan feh tlang thei vivonak ding ka lo sawm.

Ka lungawi.