SAYA LE TLAWNGTA THUSUHAWKNAK (1) (PATHIAN A UM NGAINGAI MAW?)

Saya: Pathian a um ti na zum maw?
Tlawngta: Aw zum.

Saya: Pathian hi a ṭha maw?
Tlawngta: Aw, ṭha e.

Saya: Mangbangza thil ti theinak teh a nei maw?
Tlawngta: Nei e.

Saya: Khensa natnak neitu pawl in Pathian hnenah thla an cam. Asinan Pathian in a bawm/run thei lo. Cucu Pathian a ṭha kan ti thei ding maw si?
Tlawngta: (Zianghman a let lo).

Saya: Na let thei lo maw. Ka lo suh hrih ding. Pathian na zum lai maw?
Tlawngta: Aw, zum lai e.

Saya: Asile Satan teh a ṭha maw?
Tlawngta: Ai, ṭha lo.

Saya: Satan hi khuitawk in a ra?
Tlawngta: Pathian hnen ihsin a ra.

Saya: Na dik. Ka lo suh bet ding. Khawsia, khuavang pawl teh an um maw?
Tlawngta: Aw, um e.

Saya: Khawsia le khuavang pawl hi leitlun hmunkip ah an um ti aw. Pathian in ziangkim a tuah thei ti teh a dik maw?
Tlawngta: Aw dik.

Saya: Ziangruangah khawsia, khuavang pawl hi Pathian in a siatsuah ṭheh lo.
Tlawngta: (Zianghman a let lo).

Saya: A ṭha. Leitlun ah dam thei nawn lo dingih natnak phunphun neitu pawl, farah harsa tampi an um ti aw?
Tlawngta: Aw si. 

Saya: Himi pawl teh zo in a sersiam?
Tlawngta: (Zianghman a let lo).

Saya: Tikpan fimnak cun minung in theihnak ci-nga kan nei ih, leitlun ih thil cangmi pawl hi ṭha ten a zingzoi thei a ti. A dik maw?
Tlawngta: Aw dik e.

Saya: Pathian na hmu dah maw?
Tlawngta: Hmu dah lo.

Saya: A aw teh na thei dah maw?
Tlawngta: Ai, thei dah lo. 

Saya: “Pathian a um” ti hi thil pakhatkhat in si maw, theihnak in si maw, asilole hmuhnak in si maw Pathian ih lo simnak na thei dah maw?
Tlawngta: Thei dah lo.

Saya: Zianghman na thei dah fawn lo. Cucu ziangah Pathian cu na zum thotho?
Tlawngta: Zum thotho e.

Saya: A tak ih zingzoi paihtu pawl le tikpan mifim pawl tam sawn in “Pathian a um lo” tin an lo sim sehla ziangtin na letsal ding?
Tlawngta: Zianghman ka letsal lo ding. Asinan “Pathian a um” ti cu ka zum thotho ding.

Saya: Cuvek si, zumnak mitdel/mitcaw an ti. Tikpan thiamnak hrangah buainak a si.

Tlawngta: Cucu ka hrangah buainak a si lo. Sayapa, a sa (heat) hi na thei ti aw?

Saya: Thei tuk pan teh.
Tlawngta: Cun a dai (cool) teh na thei ti aw?

Saya: Aw, thei tuk e.
Tlawngta: Sayapa, a dai hi na thei ngaingai lo. (Khan sungih tlawngta pawl cu dai ṭhepṭhep in an um). Sayapa, a satnak hi a phunphun in na thei. A sa. A sa sawn. A sa cuang. A sa lawlaw si. A satdan cuh tuar theih lo ding tiangin a sa. Dikari a phunphun in an tah. Asinan 0 (zero) hnuai 500 dikari timi hi a sa maw, a dai saw?

A ngaingai ahcun ‘A Dai’ timi hi ṭongfang men a si. A tak in a um lo. “A Dai” hi tah a theih lo. “A Sa” hi thazung (energy) a si. Cun ‘a dai’ timi khal hi ‘a sa’ ih ralkah a si lo. A Sa a um lo men khi a si.

A peh um lai......

Hram: Lawkanite Thuta Sarpay
Lairawn Meifar
(53/2018)