INTERVIEW

INTERVIEW: SALAI STAR MEDIA (M.A IN BROADCAST JOURNALISM)

___________________________________________________

Dear ThangKolh,

a nuai lam aathudotnak no te hi Ngawn Christian Conference Magazine 2014 sungahngankhumthei en phaWl hi.

August Second Week hawngtenkuatkikleh maw.

 Na bet nuam mi um ta le bet leh maw.

 Tampilungdam.

……………………………………………………………………………………………………….

GNC Magazine Ca Interview

01.     Na min, Nu le pai min, suahnak khua

·        Thian Za Thang   @  Thang Kolh, Hannah Lal Din Thang pa tin vang sam theih.

·        Falam khua ah suak ing. Ka pai suahnak khua cu Sialsih khua hi naven Pathian na dek in Falam Baptist Association (FBA) ah Youth Director in kum 15 laih dek tak cu Falam khua ah ka umnak san uh hi.

·        Ka pa hi Rev. Hau Khaw Thawng, Ka nu min cu Hrang Hngel

02.   Na inn sungsang thu le tulaih tak na umnak.

Pathian I piakmi ka innsang nu Ro Din Pui (Kanaan khua) mi hi a,  2008 kum in Rangon pen nei dun ung a FBCY (Falam Baptist Church, Yangon) Church pastor Rev. Mike Zung Ceuin kutsih sak hi. Pathian I canau thupha canu HANNAH LAL DIN THANG na pia in kumkhat a kimnak vang May 15, 2014 in bawl leh zo ung.

Rangon pen ka neihdun ceng bek uh a kum sung in India khawpi Delhi ah Tawngkai peh tukin ka nupa in hung to vok ung. Tulaih tak cu Delhi ah um laih ing.

03.    Innsang Pathian thu tuah na ma kaih daan.

·        Inn sungsang ma kaih daan cu a lubel ah Jesuh Khrih koih ing. Pathian in mi piangthak sa nupi a piak tak cu ihempoh ah remcang em ung. Taksial Pathian tuah pawlkomnak – innsang khawmnak hi bawl leleng ung. Ka nupa le ka canu kumkhat tuah bek ka hih uh laih tak cu mahtingai in haksaknak son tuk hi theima ing. Mai lam hun can ah vang Pathian in lam huai pepel tuk tin ngaisung ing.

·        Innsang khawmnak tuah pehdun in ulenau te tha ka piak nuam mi cu; I lai banglai ah innsung sang khawmnak nikhat ah a a dembel veikhat nei thei lelengtu innsang pawl hi itukmah ten Pathian in mi nuai ah koih ma hi tihmi hi hi. Mahhang in nikhat veikhat vek (Zing maw Zaan maw) innsang khawmnak nei thei laih ngawl a um laih khapang uhtale Innsang khawmnak nei theituk in tu penpan in zuam le hung tihmi hanthawn nuam ing hi.

04.   Tawng na kainak mun/daan pawl le degrees na ngah zo mi pawl.

·        Phun-hek pen Phun-riat (Primary School – Middle school) hi Valung Middle school ah kai ing.

·        High School hi cu No(2), Falam High School, Cinmual ah kai in 1991-99 tawngkai kum in Phun-10 na ong ing. Pathian in ka ka zuamnak humah thupha pia in phunsawn na ong tik hi. Mite bangin Tuition tawng (Private tawng) ah kai thei ngawl in le tuition phapha ah kai thei ma navang tawng pangai pen Phunsawm a on tik hi cu ka lungdamzet hi.

·         Keimu san laih in phun sawm on celh bekten Phunsang Tawng (University) ah peh cih theih ma hi.. a dawmbel kumkhat le lang hawng ngak kul. Mahhang in ka tawngkai daan vang a cuum pepelnak hi.

·        Rangon – Dagon University pen 2006 kum in L.L.B (Bachelor of Law) degree la ing. Keimu san ah L.L.B hi kum-4 na kai kul in camipuai ong le sung hi 2004 in thei zo navang degree lak ngaingai cu kumkhat le lang laih ngak kul hi. 

·        BA (hons) Political Science –  Delhi University (New Delhi) pen 2012 kum in la ing.

·        MA(BJ) (Master of Art in Broadcast Journalism) hi cu MAKHANLAL CHATURVEDI NATIONAL UNIVERSITY OF JOURNALISM AND COMMUNICATION, BHOPAL (M.P.) pen la ing. Ka study center cu NISCORT (National Institute of Social Communication and Research Training), Vaishali, NCR – New Delhi ah hi.

05.    Nunpatnak (Salvation) na ngah daan thu

Tettikhaan pah nang maw… heee

Nunpatnak hicu ka nu le pa mi piangthaksa le Pathian na dektu a hih haw tak cu ka naupang penpan in Bawi Jesuh nunpantu a hihnak cu na pomsaleng zo ing. Mahhangin thilsual bawl tuk hi ngamhim ma in. Mahnaven phunkua ka kainak Falam, Cinmual vengpen mi piangthak nupi nu pakhat in lamzin ka tawhdun uhnak pen… piangthak toh cim, atu na thi en vanngam kai rori tuk ing tin umngam cim.. tin na dong a… ka thin su lo king. Mahti a dot tak cu vuuk tin… vanhum ngam hengtuk ing tihmi ngammuannak ngangai ka neihlaih ngawlzia thei dun ing. Mah nahitak cu… Nunpatnak ka ngah theihnaktuk in tiin Pathian nel al zaan sial in thu na ngen ing.

Mahtibangin ka um sawng hali hawngbang.. ciangciah ma zo ing.. mahten.. ka umnak Hostel ah keimuhte kilkhawitu Rev. Tlei Thuan (Atu Valam Laizozin veng aa Baptist biakinn ah pastor dekli laihtu) in crusade pikhat sung na bawl hi. Mahmi tum in Pathian I Leimi sualte a it leita hangin a capa Bawi Jesuh pia in keimah a patnak thu ciangzet in thei ngah ing. Mimi ka theihciang zaan penpan in Pathian nelpen a heng mi Ngammuannak ngaingai, Hawvang Nunpatnak cu na co ngah ing. Mahmi sawng hi thih tih hi launak nei hihim ma ing (miten piangthak tinahen ka tihnak kha ngawl in a taktak in na hihi) Pathian min thangphat in um ta hen… Amen. 

06.   India ngam na hen pat laih haksa natih bel mi le nop natih belmi pawl

India ngam ka henpatlaih Hak ka tihbel mi cu… innkhaan pi-6x7 khaan sungah khaw salehtuah, mihing 14 laih, ka u pano panih tei innkua, ka Nu le Pa le mikhual hekkhat tuah, innkhaan padinpoh umngawl uapzet sungah khaw-um tui luangphah in ka um uh mi hi hak ka tihbel mi na hihi.. mahmi ngawl haksaknak son tuk hi ta em laih… hak ka tihbel mi na dot tak cu hak ka tihbel mi bek na langtik ing.

Nop ka tihbel mi cu … a hum aa ka son mi tuah pehdun in… innkhaan neuno sungah mihing tampi um na vah ung… ka u Rev. Dr. Khaw Lian Uk tei nupa I lamhuainak in taaksial innsang khawm ka bawlnak uh ah aipuang lilei no in Thungen, Lasa, Pathian thu thazaangpiak dunnak ka neih uh mi le thunget celhten… inn khan neuno sungah mihing tam leita, tetdun leita tak cu upa deuh hempoh ummun ah dingin naupang deuh pawl in cibai buk pepel (Lai khawlam aa khaw khat le khatkhat Gospel Team vak ten khawdawng pen banal kung phut in pakkual tuah muakdun in inntekten mikhual te cibai a buuk haw bang) in nopzet in aipuang lilei no in um in neicalam no tuah Pepsi inten dimdiam in ka um uh mi hi phawkngil thei tuk ma ing.

07.    Broadcasting line na laaksannak thu:

Hi thudotnak na bawl mi hi cu thiam lawlaw uh ci… Broadcast Journalism ka laknak san cu:

·        A pakhatnak ah Keimai thiamzawng (Talent) le ka nahzet mi (Interest)  cihthiamnak na hi hi. 

·        A panihnak ah Kawlngam (National level) mi ah Media lam zirsuak ngangai hi dem no hung. Chin level ah vang Short term course Training tihvang aa zirmi hi um ciakcuak hung. Tulaih taka a Chin Onlin TV aa dektute hihin.. ngamsung aa T V lam aa na dektu eimu laimi te vang thiam cuca ngai nei nawl in Training demlaih bek kai in dektu na hihaw. Mahhang in Ngampi ca le eimu Chin  ca hihim in hitibang zir in a thiamsuak ngangaitu pakhat bek a um uh kul tih ka ngaihsut hak in haksatnak tampi um naven thuak lo in ka zirnak san hi.

08.   Political Science le Media na zirnak ah haksan na tihbel mi le nop natihbel mi pawl

Political Science ka zirnak ah hak ka tihbel mi cu lai lam hingawl in ka umnak inn pen ka tawng kainak mun hi khawlazet, a dembel nazi pakhat le minute 20 hawng ngeikul… Delhi khawsik bel can December  penpan January ha sung a daap hempoh thuak hi hak ti bel hing. Nop ka tihbel cu haksa koko in lai ka zirmi camipuai phi in result a suak can ten ka ngaihsut bak ngawl in Pathian in mat phazet tuah a ontik hi nop ka tihbel mi le ka lungdamnak bel hi.

Media Tlawng  ka kainak aa hak ka tihbel mi cu sum le pai lam na hi hi. Tawng fee le tam, bawmtu le nei ma, Scholarship (Prospect Burma le UN lam pen tawngkai pawl bopnak tale keimuh a kai ngangai te sang a zolthiam te ngeh in ngah haw… mihing hihnak cun Prospect Burma le UN bopnak thu neitu tei hum ah ka thin na em)  le ngahma, ulenau Peter Van Uk Lian tihsial ngawl bawmtu ka neihngawl tak cu Tawng fee piak can hen ten ka thinhak theizet ing.

Media Tawng ka kainak aa nop ka tihbel mi cu a hum aa ka son zo bangin keima zirnah zawng le thiam theih zawng mi a hihtak hake m tavang… ka kaipih Vai teklak ah amu level sang saangsaw in mark ka ngah mi hi ka lungdamnak ngengbel hi. Media Tawng aa mark ka ngah mi semester veng hawng kom in 73% (First Division) in ka celhsuak thei hi ka lungdamnak le nop ka tih bel mi hi. Sunlawihnak hempoh Pa Pathian in na co ta hen…

 

09.   Ngawn miphun sungpen Broadcasting Line lam latu demno laihhungleh Ngawn Mino te tha na piak nuam mi pawl

Ngawn miphun sung bek sialngawl in Chin mi sung ah Media lam Tawng ngangai ah kai in zirsuak hi ka theih um ma laih (ka thei sual ta ngaithiam un) hung le MEDIA lam ah zirsuak mihing tampi kul hung. A ngampi uh hi a khantoh pepel theihnak tuk in THU THEIHNAK le THIAMNAK nei tampi kul hung. Ngam le Miphun a khantoh theinak tukin MEDIA hi a kulsamzet mi na hi hi. Mahhang in Bible Tawng ngeh tuptahnak nei ngengawl in kai menmun ngawl in Lai thiam, Phunsawm ong le Degree ngah thei cin pawl in Media lam le Secular a ngam le miphun ii kul mi zirsuak le thiamsuak thei tuk in a zuamtuk uh hi thupizet hi.

Bible Tawng ceng mihing tampi um naven eimu ngam ah Pathian thulam khan toh sang in Pawlthak din, tawngthak din le Kawhhran sungah buainak suahtu tam suak men thong hung. Mahhangin Bible Tawngkai te vangin Pathian thu Tak zirin a zir ngawl mi Mipi lakah Pathian thu a thuukzia le a thupit zia son theitu mi tampi kul laih hung.

Mahhang in Ngawn khangthak no te phunsawm ong rori tukin na zuam nung. Mahten a phabel cu India ngam a phunsawm ong sangin eimu ngam Kawlngam rori pen Phunsawm a on tuk le Degree pakhat bek a ngahta tuk uh hi thupibel hi. India ngam pen Phunsawm ong in lain a thiam em tavang Kawlngam ah na ong ma ta cun… Kawl ngam na pin leh ten nadeh pha le officer hi thei cuang tuk ma ci.

10.     India ngam pen MA (BJ) degree ngah theituk aa Pathian hi nangmah a lamhuaih daan le na zuamdaan pawl

-          MA(BJ) ngah theituk in Pathian nasatak in keimah umpih hi. Secular lam in MA ngah theituk in Rangon ka umlaih penpan in Pathian lak ka ngetsa mi hi. India ah Master zir tuk rori in tuptahnak nei in na hung ing.

-          Rangon ah L.L.B ka ngahcelhbekten Kawhhran (FBCY – Falam Baptist Church, Yangon) ah Cazi dekthah ih UNICEF ah part time – Volunteer in kumnih sung na dek ing. Mah ka dehnak pen ka zirnak, thiamnak hisang in a sang saw deuh tale Khua le ngamca hihen Pumcawmnak nadeh thupi sawn ngah theituk ing tihmi theihnak nei ing. Mahhang in imah nei ngawl tavangin Pathian muangin Delhi ah hung top ing hi.

-          Pathian in ka thungetnak le ka tuptahnak a theihpih in Delhi University pen BA(Hons) ka celhten MA zir theituk in lamzin hon sak hi. MA zir suak theituk in University pali laih ah Entrance exam bawl kawkaw ing mah sungpen ka mat a phatak cu Media tawng ah Entrance kulngawl no in Admission na bawl thei ing.

-          Himi zirsuak theituk in a hum a ka son zo bangin Scholarship ka ngahngawl tak cu ka thinhakzet ing … mahnaven keimah sponsor theitu tuk Pathian in Nupi Kuthiam nei (Beautician) pia in amah in keimah na cawm hi. Mahhang in keima ca a sun le zaan thunget sak lelengtu ka nu le pa le ka nupi hum ah lungdamnak sonzawh ngawl nei ing. Ka tawngkainak kumnih sung a venghawng in Rs. 3,00,000/- (Tingthum) val bo ing.

-          Zuamnak lam a hitale cu; kumnih MA(BJ) ka zir sung hi inn ah nopzet in ka cawlh can hi nikhat ah hihbuh sung nazi 5 sung fang hi. Assignment tam caanten ka zaanhah can hi tampi. Innpen tawngkai mi ka hih tak, ka umnak pen ka tawng hi Metro tuah in nazi 1:30 sung hawh kul hi. Delhi khaw pawleu ah ah hi… zing 6:00am tho in tawng hawh ing aa… zaan nazi 9:0pm hawng ten inn ah heng leh ing. A caancaan khaw sung ah News ka lak can uh, Video ka zuk can uh, Film ka bawl can uh le Photo ka zuk can uhte cu hawh kawkawi tak cu cim thei em ing. Tuptahnak nasazet in nei ma en cu First Semester hawngten cawlhden awh zo hi… Lai le hak, Practical le tam, Assignment le tam tak cu… keimah le keimah ka porhdunnak kha ngawl in… ka zuam daan hi cu a thi ngawl fafang ing. Mahti ka zuam hangin Pathian in thupha a piaknak hi tin mu ing.

11.      Mai lam Ngawn miphun ca/Pathian ngam ca na tumtah mi pawl

Mailam Ngawn miphun ca hi ka bawlnuam tam em naven oh Ngawn miphun mi cip cihcuhzet ngeh a hih uh tak cu baih cu baih ma hi. Mahnaven Pathian in thupha na pia pepel hen na Khantohnaklam a thupibel mi Cihthiamnak lam ca in … mi Piangthak, Micip, Laithiam tampi a suah theihnak tuk ka tih theih daandaan in zuamtum ing, a panihnak ah Social Development… lam hi nasatak in deh thei tum ing. Himi nadehnak ah amasabel in Pitek, Putek cawmnak mun pakhat  Ngawnngam sungpen a laizangbel mun pakhatkhat ah din thei en tih hi nasatak in ngaisung ing.

Pathian ngamca a hitale… ka zir suakmi Media Thiamnak mang in hawvang pai tampi kaih theihnak tuk in nasazet in zuam tuk ing. Mahten kawl ngam vang a pha pepel tale ngamsung ca in Ngawn Media Channel vang dingtheituk in nasatak in zuam tum ing. Atu dinmun aa a deh theih uh mi cu Global N gawn in lungmucun no in a vaihawm thei uh en cu Online TV vang bawl theih cu na hi zo hi. Keimah bulpak in bawl nuam em naveng sum le pai lam ka haksat hangin imah ta pan thei ma laih ing.

12.     Tu hun caan ah Ngawn miphunte hi muntihkim, ngamtihkim ah um hung leh ai ti bangin pawlkomnak nei thei en pha ol kaw, nangma deihsak daan pawl

…. Amasabel in Pathian theitu hingawl sawn in Pathian ii  theih rori mi, mi piangthak ngangai, Ngam le miphun ittu pasal ngalpha kul hung, mahmi pawl in mun tuamtuam kha ngawl in Leihun huap Ngawn (Global Ngawn Community) tihmi ah lungmu cun no in na dekkhawm thei le hung, mahbekten Pathian in lamhuai tuk tihmi hi ka muh daan na hihi…Atu aa hotu te felma, piangthak ma ka tihnak kha ngawl in a kul uh mi ka son nuam sawn mi hi. Mahtibang in ke a kal thei uhta cu Pathian in ngawn mi bek khangawl in Chin mi nasazet in na cawisang tuk hi. Mahten a thupizet pakhat um leh mi cu Ngawn tihmi bek ah lungput nei ngawl in Chin tihmi ah lungput nei in thinlung zalzet in na dek thei le hung tihmi ka deihsak daan hi. Mahti khangawl in NGAWN tihmi bek ah thinlungput thukzet a nei uh khapang tale Pathian in ngampi hotu in tengnap tuk ma hi. Pu Kap Cung Nung te khi zohtehtakzet haw hi.

13.     Pu le pa tei nun daan pen cum taak, zuitaak na tihmi pawl

·        A THIANLIM MI ITNAK LUNGPUT A NEIH HAW MI

·        NGAL HAANNAK

·        THINLUNG THIANLIMNAK

·        INN NEL TE IT LE SUNSAK A THIAM HAWNAK

·        A TAIMA HAWNAK

·        SIA LE PHA LAM AA A SUNSAWK DUN HAWNAK

14.     Miphun phunkhat a khantoh theihnak tuk aa kulcaam na tihmi pawl

·        Pathian hi miphun ca in humtabel koih

·        Mai miphun zahpih tukma

·        Laithiam tampi suak theituk in tha pe theitu miphun

·        Nadeh Zuam/Taima/Lol

·        Ngam khantohnak caa in thungen leleng

·         Siikaan neinak (Caan mang thiam)

15.     Ngawn Lai (Ngawn Literature) khantoh theihnak tukaa kulcaam na tih mi pawl

·        Oxford Level in NGAWN dictionary phazet suah

·        Mipi in Mai Awn le Mai Lai hi sunsakzettuk

16.     Tulaitaak na umnak India ngam um daan, mino tei theihkul na tihmi pawl

India ngam hi a khangto lilaih mi ngan hihaw tak Sumdawnnak lam le Cihthiamnak lam hi nasatak in khangto haw. Leihum I theihbaan tian in khangto haw zo. Hihi Mino tei taimaknak hang na hihi. PM thak a thek haw sawng hi India ngam nasazet in kiamsuk hangin mipi te cu phuciak in umli haw. Mahnaven mah le nadehtek in mainawt theituk in nasazet in zuam haw.

Ngam khatnak aa heng teica cun poimawh ngetuk ma naven… Kawlngam um laih le India ngam aa nadek, tawngkai teica in nasatak in a theih uh kul mi cu … nu le pa, unau sungkhat tuah umten ngawltak cu mino tampi te zalenzet in nung in akua ma theihngengawl in minsia tampi haw hi.  Mahsungpen Numei le Pano hihnak lam hi saangzet tak cu Ngawn khanglai hekkhat in Vai tangval le Mihaang tangval tei deih babangin puikawi theih um ciakcuak hung hi. Hihi khantohnak hi ngawl saw in miphun ca in Nget lung pakhat na hi hung.

Mahhang in nasatak in ngallin tuk hi thupi hi. Pathian kihca no in umvang tampi leng, mahnaven siatnak lam hin mi tampi beng ah thuzak baih saw a hihtak ngalinzet tuk hi thupi hi.

India ngam um pawl in mai umnak tek aa Kawhhran pakhatkhat ah felno in a um tuk uh le Ngawn mi upa tei lakah thil sia le pha dot leleng tuk hi thupizet hi. Mahti ngawl in a deih uh babang in a um uh tale mualphonak a tawh ngangai uh ten eimuhte bek kha ngawl in a miphun pi uh minsia hi..

17.      India ngam aa na khawmnak pawl min, Christian tei nun daan, Church um daan le  Mission na dehdaantuk pawl

·        India ngam Delhi ka hen sawng pawldang ah thawn ma ing. Ka u Saya Pa Uk I Pastor a dehnak DBC F (Delhi Burmese Christian Fellowship) ah 2008 penpan tuni tian khawm ing. Delhi ahhin Chin mi tei phuan mi kawhhran 30 laih kim zo. DBCF hi Delhi ah Kawlngam mi tei khawmnak a ding masabel mi na hi hi (Est. 1992). Himi kawhhran ah 2010 le 2012 kum Mino President in de king aa, 2013 ah bupi Vice Chairman de king, 2014 sung hi Bupi Secretary dek ing.

·        Umtu tei nun daan cu Pathian thu lam ah mah le tawk in khangton em haw. Church um daan lampang hi cu tluang em poh ung. Missionary hi ka um sawng in kum sial hah thei ung le India ngam sung le Kawlngam sung ah 8 laih kum hah ung. Missionary nadehlam cu cak lawlaw.  

18.     Tulaitak na umnak address, Contact Number le E-mail address

A-1, 84/C, Chanakya Plac, Phase –II,

Uttam Nager

New Delhi – 110059

Mb: 91+9560421325

thangkolh@yahoo.com

Lundam