Ramleng Um Mino Pawl Dinhmun
…………………………………………………..
By: Salai Star
Pathian in Chin mi ziangmawzat
ramgleng ah in kuat. Hmailam ih kan khua le ram tungdingtu dingah a si. Mi
tampi cu Fimthiamnak hawl in an can an hmang. Mi tampi cun Hnatuannak in can an
hmang. Mi ziangmawzat in Bible Tlawng an kai. Pathian ih tumtahnak thei cuca
loin nomnak men ih can hmanglamtu ziangmawzat tla an um ve. Ramleng thleng Mino
lakah ahleice in kan ram thawn a naibik Indiaramsung thleng Mino pawl dinhmun
thlirtlangnak kan nei ding.
Ram sungah Chin mi ziangmawzat
hnatuan dingin le Fimthiamnak zir dingin India ram ah mi ziangmawzat kan
thleng. Ramri nai ih um pawl cun Thing-aat, Lothlo ih hlaw-aw na, Khawpi
Champhai le Aizawl etc. lam ih thleng pawl cu Hnen-um, Dawr hnatuan ih hlawh-aw
na an si. Cumi leng ih hla deuh Chanai, Bangalore le Delhi lam thleng Mino
tamsawn cu Company ih hnatuan le Hnen um hna tuan in khua an sa. Pathian thu
zir dingin Bangalore, Chanai le Delhi lam tiang thleng tla an tam zet. Secular
lam ih zir hi mi malte lawng an si.
Chin mi pawl in napi in ruah ding mi
kan nei. Cucu ziang a si tile Chin Mino ramleng thlent tampi in thiltha le
thansonak hrangah siloin mi khua le ram kan thlengih “mi pawl ziangtin an
thangso, ziangtluk an zuam” tihmi zir sawn loin tulai khawvel daan a simi
lernak, nupa si hrih lo ih duduh ih um, hnamdang midum mi sen thawn duhduh ih
nuamzet ih um daan a cawngtu mi ziangmawzat kan um hi a poizet mi a si.
Hitizawng in khua kan sa ahcun ziangtik hman ah mi kan bang dah lo ding a si.
2010 tiang India Khawpi, Jaipur le
kiangkap Bible Tlawng ihsin thaten course kim ih zirsuaktu hi Pathian zarah mi
ziangmawzat kan nei. Asinan, Secular lam ah hi siar ding a um lo. Tlawnglut
ngah si ih (Admission) degree ngahtiang thehsuak ngaingai hi an um lo. 2011-2014
lawng ah Secular lam ih Degree ngahsuak hi pakhat pahnih lawng kan um a si. Bomnak
duh ruangah mi 200-3
00 in admission tuah a siih asinan
tlawngthehsuak tiang kai hi an mal. Bomnak ngah lotu pawl sawn, Fimthiamnak duh
ruangih a kaitu pawl sawn mi malte in BA, MA degree an ngah suak thei sawn.
Cumi thu theih ruangah bomnak petu pawl in tla 2013 ihsin tlawngkai bomnak hi
an cawlhsan a si.
Chin mi pawl kan ruat that a tul mi
cu Pastor tuan hi sumpai a lut tam, a nuam tin kan ruat ruangah le ram-uknak that
lo ruangah kan tiih Bible Tlawng ah kan lut ciammam. Secular lam hi kan ngaihsak aw lo. Tu ah ram
uknak a tha vivo zo ih acozah hnatuan sutlut a tam kan tiih Secular lam ah kan
lut ciamman lala. Kan Chin mi in Secular le Theology lam ah bangrante in mi
fimthiam cathiam kan neih a tul a si. Cuti lo cun Kawhhran pakhat ah Pastor mi
pa 5 lai kan tuan tlan a tul ding. Thu hi ciamciam in ruah a cuu a si. Biaknak
lam, Politics lam, Business lam, Social Work etc… tin kan thiam khawm a tul a
si.
Ram sung dinhmun le India Khawpi ih
um Chin mi pawl kan khaikhin tikah ramsung ih um Chin Mino pawl hi Pathian
biaknak Biakinn ih thlentu hi kan mal a si. Khawmnak ah nupi pacing, pitar
putar hi an tam deuh. India khapi lam ahcun Mino tampi cu company hna an tuannak
ihsin 6:30 pm hrawngah an tlung ih inn ah tlungta loin Biakinn ih khawm fehcih,
Hlazir tlang tivek hi an tamsawn a si. Mino pawl hin Pathian thu an duhzet
thlang a si. Himi ka ti ruangah ramsung ah Mino Pathian duh um lo tinak si loin
kan um konan a tlangpi thu in thlir ih kan hmuh daan a si.
Ramsung ram leng um Chin mino tampi
ih kan tuah thei um sun cu.. Hnatuannak ih sing lengsuak can ih khasung mawinak
ah Mobile thawn zuk ih FB ah post tihi a si. Himi in thansonak a um lemlo. Cu
ai in kan zuk lawnglawng post loin thutha hla tha kan theih mi pawl tarlang ve
thiam sehla. Mai zuk lawnglawng thupi lemlo tar cu zohman in an zoh paih lemlo
a si. Curuangah ramsung/leng um mi kan Chin mino tampi tan kan lak a cuu zo a
si. Um maimai, Um huaha ding can a sin awn lo.
India khawpi um Chin Mino tampi cu
2012 ihsin Bible Tlawng hnakin Secular lam ah tan an la thok ih tu ahcun mi
ziangmawzat University ih zir rero BA, BSc. Pol. Sc, Social Wok, Rural
Decelopment etc tiin an zir rero zo. Mi ziangmawzat in tla Degree an ngah zo a
si. India khawpi ah Chin mi 10,000 lenglo an um ih sumpai hawl na, hnatuan na,
Fimzirna an si. Mi tampi mahte dawr tla an kai thei zo ih, Vai pawl thawn
kom-aw in dawr tuahtu al an um phahphah a si. Hiti ih an umnak san hi thudang
si lo kan khua le ram hi duthusam in ei-in hawlnak satuk lai ruangih mi ram ih
bawklawk mi an si.
India ram hi Mesa lam ah siseh, IT
lam siseh, ei-in hawlnak a harsa lo ruangah Kawlram mi thawng-100 hnak ih tam
hi India ram ah mi mithmai zoh cingte in khawsa ih um a si. Chin mi tampi in
sum le pai hman daan hi kan thiam lo a si. Malte ngah le hmang theh, tampi ngah
khal le hmang theh. Sumpai tenren zia kan thiam lo. Ahlece in ramsung um pawl
hin sumpai hi a tul lemlo in Lakphak dawr le tuktak einak ah kan cemralter mi a
tam tuk. Inn ah thaithawh, suncaw, zaanriah ei ding kan neih cun lenglam ih
sumpai hman hi uar tuk ding a si lo. Paisa tawdok thawn a bangaw a si.
Curuangah a zeizongza ah kan fim a
cu zo. Hiti kan um men ahcun kan ram a tha saal hmanah hnamdang pawl in in hoha
a tul thotho ding a si. Chin mino in Vanzam mawngthaimtu kan tul, Tlangleng
mawngthiamtu kan tul, Metro mawngthiamtu kan tul, Computer lam thiamsang kan
tul ih, Pathian tihzahbu cingte ih Ramhruaitu tha tla kan tul a si. Chin mi atu
ihsin tho in ding saal thlang uhsi!
Duhsaknak tumpi thawn….
_____________________________________
Media ih hmual neih zia
By: Salai Star
Media timi Tongfang hi ziang a si?
Media ih hmual neih
zia kan tarlan hlanah Media hi ziang a si tihmi kan zohtlang ding. Media ih a
san thei mumal loin nauhak upa in ka saal rero mi hi ziang a si tile “Thutheih pehtlaihnak
le Khawtlang pehtlaih Khawmtu” a siih cu tiih Thu theih theinak dingah Media
Hmanrua/ bungrua (Media Tools) tampi an um ih cumi pawl hmang in Media ih hmual
neih zia kan langter thei a si.
Media Hmual Neih zia:
Tusan hi IT
(Information Technology) san, Digital san, a si zo ruangah Thu le hla ziangkim
hi ol-aiten theih a theih zo. Curuangah Media ih hmual neih zia hi a sang
sinsin. Khuahlan ahcun Thuthang thanawknak ah TV, Radio, News Paper pawl hi
Media hmanruah ih hman bik mi a si. Phone hi acozah le milian pawl lawng ih
hman theih a si. Asinan tu san ahcun cumi pawl hnak ih cak Internet a um zo
ruangah himi hin Media hnatuannak nasatak in hma a sawnter.
Internet ihsin
Website, Sosial Media, E.mail etc… pawlin khawvel hi a cil neknek. Curuangah
Media hnatuannak hi Cerek mu hnakin a
cak/rang sawn zia kan hmu thei a si. A thupte’n na inn sungih thil tuah mi mipi
hmuh in media in ol-aiten a pholang thei. Fimkhur lozet ih na thil ti mi, na
tongkam, na um daan pawl in atu rori ah a lo ti mualpho thei a si. Curuangah
ralringzet ih kan um a tul.
Media hmaruan tampi
sung ihsin ni Christian pawl hrang Pathian ih in pek mi hmanrua cu THLACAMNAK
hi a si. Hihnak ih cak le hmual nei leitlun ah a um lo. Curuangh kan ram a that
saal theinak dingah thla kan cam ringring pei uh!
______________________________________________
Kawlram
Hrilawknak ah NLD in Nehnak A Co Ruangah
Refugee Hrang Vaivuan Ding A Si Lo
By: Salai
Star
Tukum November 08, 2015, Kawlram hrilawknak (Election) ah National
League of Democracy (NLD) in 83% (anmah
NLD ih tlangzarh daan) in State tin le Division tinkim ah a neh neknek a si. A
lungawi um rualrual in Delhi, Malaysia le Thailand ram ih um mi Refugee pawl
hrangah vaivuannak tumpi a suak a si. Ziangruangah tile tukum rampi hrilawknak
ah NLD in nehnak a co ahcun Ramtin ih um mi Kawlram Refugee zate Kawlram ah
kawhkir saal theh tum thu NLD Chairperson, Pi Suh Kyi in USA President, Obama
hnenah a rel suak dah (Himi thu hi..
Obama in tukum hrilawknak ah NLD in nehta bang sehla Kawlram hrang ziang na
tuah hmaisabik ding tin a suk tikih Pi Suh Kyi in a tuahhmaisabik dingih a
relmi cu a si.)
Cu tiih thuhla um ruangah Vaivuan in kan um ding maw? Kan zoh
tlang hnik pei!
Kawlram President thar U Thein Sein a lak hnu 2013 ahkhan ram a
thasaal rero zo ruangah ramleng ih um Kawlram mi hmuahhmuah kawhkir saal ding
tumtahnak a neih ruangah Raltlan tampi vaivuan in a um dah zo. Ziangahtile, ko
kir saal ngaingai ta sehla ziangtin kan um ding timi thu ah thlaphang le
thinhar in mipi vaivuan in um dah zo a si. Cuti thuhla um ruangah Delhi ih Burmese
Refugee hotu pawl, Chin Refugee hotu pawl le organization tampi ihsin hotu pawl
in UN PUBLIC MEETING ah cumi lai ih taunt UN Chief of Mission hnen thusuhnak le
reltlangnak an nei dah. Culai ih Chief of Mission ih a lehnak cu “KAN NI UN
HNATUANTU LE UN HIN REFUGEE CARD NGAH ZO PAWL HI KANMAI’ THU IN TLUNTER THEINAK
LE UM HRIH THEINAK THUNEIHNAK KAN NEI LO A SI. NAN RAM A THA SAAL ZO SI KHALLE
TLUNG SAAL DINGIN KAN LO NOR LUIH THEINAK THU KAN NEI LO. REFUGEE PAKHAT IN
AMAH BULPAK IN TLUN A DUH IH UN HNEN A DIL AHCUN AMAI’ DUHHRILNAK IN A TLUNG
THEI KO” tiin a sawn dah. Cuvek thiamthiam in tutum ah tla tuni tiangah thuhla
felfai theihnak a um hrih lo nan mipi kan vaivuan rero mi hi thil tul lo a si.
Curuangah tlung saal duhtu pawl cun mai’ lungsuak in tlun a theih vekin tlung
duh lo pawl khalin kanmah kelin, thinlung hahdamten um ding kan si.
Tu ah NLD in hrilawknak ah a nei tihlawng a si lai ih Ralkap Uknak
in AN THU NEIHNAK CU NLD hnenah a ap duh ngaingai ding le ding lo hman fiang
hrih lo. An ap awk ding si hman ah hmaikum 2016, May thla lawng ih ap aw lai
ding an si. Kan ram a thasaal ih Pi Suh Kyi in Refugee pawl kawhkir saal theh
ding hmanah Refugee pawl umnak ding INN LE LO, HMUN LE HMA, HNATUAN pawl in
tawlrel sak theh thei hnu lawngah kawhlai ding fang a si. Cuhman ah ziang a
bang ngai ding tit la theihfiang a si hrih lo. Kanni Tlangpar mi pawl hrangah a
tuahsak duh ngaingai pei maw? ti hman ruah ding tampi a um lai.
Tahthimnak pakhat kan zoh tlang ding… Delhi ih Afghanistan Refugee
pawl hi an ram Democracy tla a ngah zo ih, a hlanhnak cun a thazet saal zo
asinan tuni tiang Refugee kanmah Kawlram mi (Democracy ngah hrih lo) hnakhman
in an tamsawn a si. Hi pawl teh ziangruangah so an ram ah an tlun lo, an kir
paih lo tisile, tlun saal an ngam lo ruangah le ramtha saal zo cu si ko nan
rintlak ngaingai hrih lo ruangah a si. Curuangah kan ni Kawlram mi Refugee,
ahleice in Chin Refugee pawl hrangah cun kan ram ih tlung kir saal ding thu ah
thu ciamciam kan ruahta cu a tultuk lai a si. Tlung saal ding hmanah Federal
Democracy a si ngaingai ih, Sumdawnnak, Biaknak sakhua, Fimthiam lam le
Thansonak etc.. pawl felfaiten a thanso lawngah kan tlun saal khalle tlun saal
man a um ding a si.
Curuangah tlun saal ding thuhla ah mipi kan vaivuan ciammam hi thil
tul lo a si zia, cuhnak in atu dinhmun ah kan ram kir saal ding bangta sehla
ziang fimnak, thiamnak saw ka neih/thiam zo, kan ram a thanso sinsin theinak
dingah ziangtal ti theimi ka nei zo maw tih ruat sawn in hmailam thansonak hrang ruat in Pathian hnen thlacam phah in
thinlung hahdamten kan um ding a si sawn.
Tulaifang ah Institute of Chin Affairs (ICA) in Malaysia, Thailand
le Delhi ih kan Chin Refugee Card ngah zo pawl a ranglam in ziangtin kan ko
thei ding, kan hruai thei ding tiin US UN lam ah hmalaknak nasazet in an nei
rero lai a si. Curuangah UN Card ngah zo pawl vaktawi hnuaihni loin hmunkhat te
ah thaten um kheukhi hi a thabik a si.
Kiangkap ih thu lenglawng titi hi uar tuk loin thudik le thutha
kan thei duh asile nitinten New Papar siar, UN Website ah lut in, hramdiktak
theitum cio ding kan si. Mi ih thu relmi kha a hram diktak a rel thei lo ahcun
zum duh lo mai aw. An ti timi hnakin nangmahte newspaper lole a hramdiktak na
theihmi thukha a diksawn a si.
__________________________________
Media in Chin Khristian A Ciahneh Zia
Media in Chin Khristian A Ciahneh Zia
(How Media Influence Chin, So-called
Christian Society)
Thuhmaihruai:
Vankau
Arsi siartu zate Cibai ka lo buk. Himi Thulu hmangin ka ngannak san cu; Rangzet
ih a thlengaw rero mi kan san, IT san ahhin Chin
Society ah Media in nasatak in a ciahneh rero hi ka hmuh ruangah ka ngannak
san a si. Mi tampi in Media ih thutum, thil tum mi thei mumal lo in mitcaw
lamhruai vekin ping le peng ah in hruai rero zo a si. Curuang Media ih thutum/
thil tum hi theifiang in Media ih ciahneh ruangah a tlusia rero mi kan Chin Society hi a thangharh saal ding
beiseinak tumpi thawn ka ngannak san a si.
Media
hi ziang a si?
Media
ih a san cu “Thutheih pehtlaihnak”, “Khawtlang pehtlai Khawmtu” lole “Thuh Theihnak” tiin let sehla. Mai
tongkam mawi hmangin leh daan a phunphun um ko ding. Cambridge Dictionary cun “
Media” hi “Mediums” ih plural form a siih “Thuhla phorhsuahtu lole pholangtu
hmanrua” tin a tarlang. Cuti ih thuhla pholangnak dingah lole mipi thawn
pehtlah theinak dingah Media ih hmanrua (Media
Tools) hman a tul.
Media kan tihmi ah a tlangpi thu in phun-thum in kan then thei;
1. Print Media (New Papers,
Magazines, news bulletin, pamphlet, etc.)
2. Broadcast Media (TV,Radio)
3. Social Media (Internet bast ihsin ngahsuah mi thuthang)
A tlun ih tarlan mi pathum sung ihsin Broadcast Media (Visual Media) le
Social Media in nasatak in kan Chin Society a ciahneh. Himi lak ihsin ka
tarlang duhmi sawn cu Broadcast Media
lole Visual Media tiih kawh mi hi TV
thuthang phuan le Radio Thuthang phuan hi a si konan Video, Filim pawl hi Visual Media cu an si. Social Media kan
ti tikah ahlan kumbil 20 tawplam hrawng ahkhan Google, Gmail, G-talk in nasatak in khawvel hi a ciahneh nan tu
ahcun Facebook insatak in Media khawvel hi a ciahneh neknek zo a si.
Visual media le Social media ih Kan Chin Society a ciahneh daan
IT san ah Chin mi pawl kan tlangleng rero ve ih Pathian in Leitlun
khuazakip ah in thlengter. TV thatha,
Mobile Phone thatha, Computer le Laptop thatha hmang thei dingin thluasuah in
pek. Mi kan bang theinak dingah le khaw eng kan hmuh theinak dingah. Asinan
Media khawvel sung kan lut ve ih kan nei mi Media hmarua pawl hin Chin mi
tamsawn a ti siat a si.
Lai khuawte um lai ah TV hmu dah lo le nei dah lo tampi in tusan kan nei
thei, a tum le te lawng dang in kan hmang. Asinan himi TV hi Thuthang laknak,
ngainak si sawn loin Film zohnak, nom ceennak men ah kan hmang. Film a pehpeh
ih um mi (Episode), ahleice in tongleh mi Korea film, Miran Film, Vai Film pawl
lei tahrat in hnatuan can hmang thei nawn loin sun le zaan in kan zoh. A poibik
mi cu Pathian ih pekmi thluasuah hmang thiam nawn loin Biakinn khawm can,
Innsang khawm can, Thlacam can hman hngilh ko in Korea Film, Vai Film, Mirang
Film zoh in kan can kan cemter. Hminsin
ding ah Film tawi tete in pehzom ih an tuah mi (Episode) pawl hi Ram cangkang
pawl in hnatuan an baangtuk ih colhcaan malte sung an hahdamnak hrangah mal
tete ih zoh dingin an tuah mi a si. Asinan kan ni Chin mi pawl cun veikhat thu
ah cem ko in zoh theh kan tum. Hiti ih can kan hman ruangah kan can, kan
hriselnak, thansonak pawl kan hloh/can theh a si. Curuangah Pathian
thluasuah pekmi TV hi hman thiam kan tum thlang pei uh!
A pahnihnak ah Social Media (Facebook) kan hman daan hi nasatak in zir a
cu. Facebook hi ram cangkang pawl in an ram thanson sinsin theinak, an hnatuan
hlawntlin theinak, an Calai cak sinsin theinak dingah an hmang. Asinan kan Chin
mi pawl cun mai zuk post-nak men ah kan hmang tam sawn. Khawte ihsin Pathian in
khawpi ah (Rangon, Malaysia, Singapore, India West-tern) ram ah in kuat ih Mino
tampi cun Mobile phone thatha, Smart phone tivek kan lei ih cumi in Facebook le
Video zohnak in kan hmang. Mobile phone hi pakhat le pakhat biakawknak hrang
tuah mi a si. Asinan kan ni thung cun thiltha tuahnak hrang si sawn loin
thilsia tuahnak hrangah a hmangtu kan tamzet a si.
Curuangah ahleice in Chin Mino tampi in Mobile phone thawn FACE BOOK hman
daan hi thiam tum thlang sehla. Himi Mobile Phon hmangin Facebook kau in mai
zuk mawi le mawi lo tar ciammam loin Pathian thu thatha siarnak, Thuthang a
phunphun siarnak, Mai ei-in hawlnak hrangah hmang thiam thlang sehla. Chin
Calai hi Facebook a um hnu in nasatak in a thangso. Chin mi pawl ih on mi Group
tamzet a um zo. Cumi pawl nitin Pathian thu thuthang tha le Leitlun thuthang a
phunphun siar ding a um. Nangmah in tla n air-awm suak ca, thu thatha na
ngansuak thei ve a si.
Riahsiat zazet a si mi cu kan farnu le pawl hin sexy -zet in an
hnatuannak inn ah an zukawk ih Facebook par ih tarlangtu an tamzet a si. Ram
cangkang kan thleng ve ih theih sun cu mi hnen um phah in nitin mawi theibik
cei aw ih zuk post tih lawng hi a si. Himi hi mah le mah a tisiataw rero tih hi
kan ruat baan lo. Lehlam ahcun mi kuttang ih hnatuan kan si ruangah ningzakzet
in le Pathian tihzah cing ten mi kuttang ih hnatuan nawn loin mahten todelh aw
thei dingin zuamsawn ding a sinan.
Thunetnak:
Media in Chin Society a ciahneh daan hi a thalam in in ciahneh hram sehla
Leitlun level ih ding theitu, Thu theitu tampi kan suah theinak dingin nasatak
in kan zuam cio pei. Inn sungah TV tum pipi kan neih mi le Mobile phone thatha
kan neih mi pawl hi kan hmang thiam lo ahcun in tisiattu NGET tumpi a si zia
thei thiam in kan ngah mi Pathian thluasuah sumpai hi tul lem lo Internet
hrang, Film leinak hrnag hamng loin khawl thiam tum thlang uhsi! Cuti lo cun
sum le pai kan ngahsun mi te hin Media ih thatnak kan hamng thiam lo ruangah
dunglam ah in hnuk thla vivo ding a si. Media Hmanrua pawl hi Pathian kan naih
sinsinnak le Thiltha tuahnak ih hmang tangkai thaimtu kan si theinak dingah
Pathian in thluasuahnak lo cio hngai hram seh.
Duhsaknak tumpi thawn
Thian Za Thang
M.A (Broadcast Journalism)
