MILIAN LE LAWNG HLAUTU TLANGVAL ... By- Lairawn Meifar

Veikhat cu milian zet pakhat cu tiluan khoh zetmi tivapi pakhat ah lawng thawn a feh rero laiah rinlopin a tomi lawng kha a let pang. Asinan amah cu tivapi laifang ih lungto tum zet pakhat parah a thleng man ih bomnak dil in a au ciamco.

Culaifang ah lawng mawng thiam zet tlangval pakaht in milianpai’ bom dilnak au-aw a thei ih runsuak dingin a lawng cu milianpai’ umnak lungtopi lam pan in a hlau rero. Asinan tiluan a khoh/cak tuk ruangah duh vekin cak zet in lawng a hlau thei lo. 

Milianpa cun, “Zamrang ten in run lohli aw. In runsuak thei asile paisa Ks.1000 ka lo pe ding,” tin a au lala. Asinan tiluan a cak tuk ruangah nasatak in lawng hlau khal sehla a ṭhawn aw thei fangfang.

“Zamrang ten hlau awla. Ka umnak hmun ih na thlen phot cun paisa Ks.5000 ka lo pe ding,” tin milianpa in tlangvalpa kha a ti lala. Tlangvalpa khal cun a tha neih hmuah suah in a hlau rero nain tisuar le ticawk a cak fawn, tiluan khal a cak tuk ruangah a zum vekin milianpai’ umnak hmun a thleng thei cuang lo.

Milianpa in tlangvalpa hnenah, “Tidai a ṭhang deuhdeuh hokhaw. Na tha neih hmuah suah in hlau awla, hi hmun ihsin i runsuak thei asile paisa Ks.5000 ka pe ding,” tin a au neih hmuah suah in a au ciamco.

Tidai cu milianpai’ dinnnak lungtopi tlunah nuamte ten a ṭhang vivo. Asinan tlangvalpa cun lawng a hlau kha nuamte ten a fungter deuhdeuh. Cutikcah milianpa in, “Zamrang ten na lawng hlau aw. I runsuak zang aw. Paisa Ks.10000 (thawng hra) ka lo pe ding,” tin a au. Nuamte ten a dinnak lungtopi cu a pil vivo. Asinan tlangvalpa cu nuamten lawng a hlau men.

“Na lawng kha na tha neih hmuah in hlau aw. I runsuak thei asile Ks.50000 (thawng sawmnga) ka lo pe ding,” tin a au. Cutiih a au rero laifang ah tilet nasatak in a tho ih cuih milianpa cu lilet in lungto par ihsin tidai sungah a hlon ngah.

Tlangvalpa cu tivapi kapah a lawng a cawlter ih riahsia zet in, “Milianpa, ka lo runsuak tum si si. Asinan ziangah saw paisa in pek tum. Paisa pek ding na timi asile na ṭhan vivo. 

Zamrang zet in na hnen thleng sehla paisa ka ngah mal tuk ding, nuamte ten lawng ka hlau dingih paisa tampi ka ngah ding ti ka ruah ruangah a si. Curuangah tidai sungah na tla. Keimah ruangah na nunnak tiang na hloh phah. Asinan ka lo run thok tum ahhin ka thinlung sung ahcun na hnen ihsin ngah duhmi zianghman ka nei lo. Thinlung thiangten lo runsuah thei ding ka tum. Na hnen ihsin hlawknak le sumpai zianghman ngah duhnak lungput nei lo in lo ruhsuah ding ka tum rero lai ah ziangah saw paisa ka lo pe ding tin na au rero. Paisa cuhmuah khahmuah ka lo pe ding tin ṭhan rero lo in, runsuah ding na ṭulmi lawng au awla na thi lo ding nan si khawh,” tin a ti.

ZIRH DUHMI

(1) Sullam a nei lomi le hman a tlak lomi kan duhhamnak le bomnak dil ih kan aukio reromi hi a caan caan ah mah le mah harsat pekawk thawn a bangawk caan a um ṭheu. 

(2) Duh tuk ruangah kan ṭongsualmi in kan nunnak tiang a hloh phah thei. 

(3) Mi na bom duh ngaingai asile an hnen ihsin zianghmuah ka ngah ding ti na thinlung ah ret hlah.

Hram: Thuta Sarpay
Lairawn Meifar
(44/2018)