PAGLIACCI: THINHARNAK IN NA NUNNAK SIATTER HLAH (By-Lairawn Meifar)

“Na thinhar, na riahsia tuk a si ahcun hnihsuah rel thiam le lungawinak thu sim thiam pawl hnenah feh mai aw.”

Nikhat cu mi pakhat hi siibawi hnenah a feh. A mithmai zoh tikah lungawinak mithmai hrimhrim hmuh ding a um lo ih, a hruhmi hnipuan khal a thiangfai lo zet. Hitiih vun zoh tikah tuamhlawm ding hman hreh a um zet.

Beidong le thinhar zet in siibawi hnenah cun, “Siibawipa, ka thinhar tuk. Ka bei khal a dong nasa. Ziangti um ding ti hman ka thiam nawn lo,” tin a ti. Cutikah siibawipa in, “Na sim duhmi a um lai asile in sim hrih aw,” a ti ih cupa cun, “Minung lakah hin duhdawtnak hi a um nawn lo maw si ti ding khop in a hlo vivo thlang. Kei ka hrangah tla cun leitlun ah keimahte lawng um vekin ka thei aw. Nun man khal ka nei nawn lo. Hivek pawl ruangah ka thinhar tuk ih zaan ah tla cun ka itthat thiam lo. A kau zetmi tipithuanthum parah khuihmun lam pan ih feh ding a thei lomi lawng thawn kan bang aw,” a ti.

Siibawipa cun cupai’ liang a kuah ih, “Si rori. Asinan nangmah vek pawl hrangah sim ding thu ṭha ka nei. Pagliacci timi hnihsuak capoh tuah thiam zet kha na thei dah maw? Atu hi kan umnak khawpi ah a thleng. Veikhat hman ka zoh dah hrih lo. Hnihsuak capoh tuah a thiam tuk an ti ih tui zaan cu ka vung zoh ve hnik ding. Nang khal zoh vek awla a ṭha ding. Na thinharnak tla tampi a lo sawng thei ding hokhaw,” a ti.

Siibawipa ih a sim ṭheh tikah cupa in, “Siibawipa, Pagliacci hi keimah hokhaw ka si,” a ti ih siibawipa cu ṭong ding ziangkhal a thei nawn lo. Khatlam ah a ning khal a zak. Siibawi thiam dang hnenih zohawkter siar lo hi siibawipa cun sim theimi a nei nawn lo,” a ti. Cutin ni hnih a rei tikah siibawipa cu copoh tuah thiam zet Pagliacci ih copoh tuah a vung zoh. Pagliacci cu donsang (stage) parah cun phur zet le lungawi zet in capoh a tuah tikah mipi khal an nuam aw nasa. Amah rak tuamhlawmtu siibawi hrangah cun mangbangza zetmi thil pakhat ah a cang.

Thla tawkfang a hung rei ih capoh thiam zet Pagliacci cu beidon le thinhar nat thawn a nunnak a cem thu thuthangca ih an suahmi kha amah zingtu siibawipa in a siar ngah ngelcel. Siibawipa cu a thinlung sungah thusuhnak tampi a suak.

“Midang lungawi le nuamter rero theitu pawl in beidonnak le thinharnak an ton tikah zo in a va hnem ṭheu?” timi thusuhnak pawl a thinlung sungah a suak ciamco ih a siar reromi thuthangca khal siar thei nawn lo in a cawl.

* Minung ah riahsia thei lo, beidong thei lo le thinhar thei lo pakhat hman kan um lo. Midang pawl hni dingih a tuah rerotu pawl khal hi riahsia le beidong ih an um caan tampi a um ṭheu. A thupi zetmi pakhat cu: Kan thinharnak le kan beidonnak hi kan nun siatsuahtu ih canter lo ding a thupi ngaingai.

Credit: Golden Dreams (Ye Thwe Naung)
Lairawn Meifar
(41/2018)