NA THINLUNG I PE AW

Add caption

(Sermon by – Pu KT Sui Lian, Melbourne)
Ca siartu nangmaih thinlung kha Bawipa in a lo dil ti kha rak theithiam hram aw. In rundamtu Krih Jesuh in, "Nan hrangah ka nun ka pek, ziang ha in pek ve ding"? a ti. Dil mi in nei asi. Pek ding a phunphun kan nei men thei.


Eg. Sumsaw, fimthiamnak le Thuthangtha sim ve …etc. Asinan  in dil duhmi taktak cu, Thufim 23:26 (Kawl Bible) ah, fiangten a sim ko,  “ Ka fa, na thinlung i pe aw” in ti asi.  Kan thinlung in dil asi. Bible thu fehdan  kan thlurh asile Minung leh Pathian kan bangawknak zawnte cu thlarau kan neih mi hi asi. Kan thlarau cu Adam sungah, Pathian thu awih loin thingrah a ei ruangah thihnak (Pathian thawn thenawknak)a tuar, cu rualrualin, kan thinlung le kan taksa khal Pathian in a hlonkhak ve asi. Cuihsin an thinlung cu Setan in a uk ih, an cithlah zaten Hell ram tlak hmabak sual fate ah kan cang thluh asi..  Thinlung cu kan nunnak ah thuneitubik asi. Kan nunnak ih a um mi, duhdawtnak , zanfahnak, kan taksa , thlarau le kan ruahnak pawl hi, kan thinlung in a control thluh mi an si. Curuangah Pathian in kan thinlung a thupitbik zia a thei ih in dilnak asi. Thlarau lam nun ihsin kan zoh asile a tlangpi thu in Kristian nun ah  thinlung phun (3) a um. Cupawl cu :-

Pathian ih in pek hmaisabik mi thinlung:    

Adam le Eve hnenah Pathian in a pek mi, thinlung kha asi. Cucu Pathian in a hmaisabik ih in pekmi kan thinlung (Original mind) cu asi. Cuih kan Original thinlung cu, kan thla rau le taksa thawn (Pa, Fapa le Thiangthlarau cu pumkhat an rak si vekin) pumkhat an si ve. Cuih san ih kan thinlung cu a thiang hlim ih Pathian thawn rualremnak an  nei. Pathian khal in tha ati,(Gen. 1:27-31).  Kan Original thinlung in a rak uk mi Adam san ih kan nunnak cu thihnak , natnak le thinphannak tvp ih cawhbuai thei lo mi a rak si. Pathian uknak thlarau ramah nuamzet in um theinak an rak nei. Hi, Pathian ih pekmi “Minung thinlung hmaisabik ”  cu Eden tluksiatnak ruangah Setan tur in a rak luahkhat thluh zo ruangah, Pathian dan in mi thi asi zo. Curuangah Pathian in Adam khuiah so na um? A rak ti, a rak hawlnak asi, (Gen 3:9). Curuangah Adam cithlah minung hmuah hmuah cu Pathian dan in mithi lole thlarauhlo kan si thluh zo asi.  A poituk e, tluksiat cu!

2.     Setan ih uk mi thinlung :   

Cu Setan vekin a thupten mi phiar a hmang, mi siatnak tuah a duh, mi relsiat leh ei ruk hmang Pathian thutak dodal ringringtu mi puarthautak hi a si. Eve le Adam thinlung cu Setan in a bum neh ih sual tur in a luahkhat thluh hnu ahcun  Pathian in ei hlah uh a ti mi thingrah ei (Pathian phatsan) ta rori cu an rak duh ih an rak hril sawn thlang asi. An tluk siat ni ihsin  Pathian thawn an pehzawm awknak a cat ruangah an thlarau nun thinak asi,    ( Gen 3:6-7; 23). Pathian in a hlonkhak hnuah cun Sual tur hnatuannak cun tisa cak hiar nak a neither, fa an hringih misual ci an thlah. Cuti cun milai cithlah hmuahhmuah cun Setan ih uk mi thinlung sual kan neih thluhnak asi. Setan ih uk mi thinlung cu  Pathian in, “ bum hmangbik le selailetder, Tidam theih nawn lo “ ati, ( Jeremiah 17:9). Setan ih  a ukmi  thinlung neitu minung cu Pathian in rul cithlah, Setan fa nan si  in ti asi. Cuihsin thawkin mi zo khal, Adam le Eve ih sual man, kumkhua thihnak Hell rosia cotu dingah, camsiat in kan um thluhnak asi. Curuangah zangfah thiam kan  Pathian in Hremhmun ihsin kan luat theinak dingah le lei malsawm, van malsawm kan dawn sal theinak dingah “Nunnak thar le thinlung thar ka lo pe ding” in tinak asi, (Ezakiel 36:26). Haleluiah!

3.     Pathian ih in pek mi thinlung thar:

Ezakiel 36:26 kan siar asile  Pathian in, “ Nunnak thar le thinlung thar ka lo pe ding. .…. Nan sungah ka Thlarau ka khum dingih ka Thlarau thawngin ka thupek nan kilkhawi thei ding ” tiah, thu in tiamkam asi. Kan Pathian cun, cuih a tongkam cu Jesuh Krih ah a famkim ter zo asi, (John 3:16).  Jesuh a zumtu mi piangthar cu Jesuh thisen tlennak zarah sualnak nei lo, mi thianghlim le mi fel ah Pathian in a pom zo asi. Piangthar pawl cu Jesuh  in a thisenin in tlen ih a nunnak khal in pe zo a si.  Curuangah  amah Jesuh cu kan nunnak thar ah leh  kan thinlungthar ah kan  Pathianin in pomsak zo asi, ( Rome 8:10-12,14; 1Kor 2:16). Haleluiah! Curuangah  Ezakiel 36:26  ih Pathian thutiam cu  Krih Jesuh ah a fam kim zo kan ti theinak asi. Cule Jesuh mizia neitu Thlarau ih ukmi minung thinlungthar cu Pathian  duhtlak um sun asi. Setan ih uk lai mi, Zumlotu lole piangtharlo pawl ih thinlung cu Pathian in a duh lo law law asi.  Curuangah Nikodemas hnenah ” Na pianthar a tul, Mi zo khal an pianthar lo ahcun vancung uknak sungah an lut thei lo ding,” tiah, Jesuh in ati,(John 3:5).

Thinlung pek timi ih umzia:

Pathian dilnak ngai poimawh ih, thinlung a pe siangtu zumtu pawl cu, mi tampi hrangah malsawmnak an si theinak dingah Pathian in Thlarau talent le lei malsawm khal a pek belh sah asi.  Bawipai hnenah thinlung pek timi ih umzia cu, Setan uk mi kan thinlunghlun ih tisa duhnak pawl bansan ih, Pathian thupek zawm ih kan thinlung takten amah rian in a hna tuan ding  kha a sim  duh mi asi.  Cucu a ram le a felnak hawl tinak khal asi. Matt 6:33 ah,  “Pathian Uknak le a felnak hawl hmaisa sawn uhla thil dang hmuahhmuah cu a lo pebeet ding a si” ti thu a ngan. Kan thinlung kan pek lo ahcun , A ram le a felnak hi kan hawl huamtaktak theu lo, curuangah, malsawm khal kan dawng tam thei lo.  Pathian malsawm (thlarauhlo tampi kan kai) tampi kan dawn theinak dingah Pathianin “Ka fa, na thinlung I pe aw” in tinak asi, Thufim 23:26.

Pathian hnenah thinlung a petu, Zohthimtlak zumtu thlarau mi tampi an um. Joshua le Caleb, Paul leh Sadu Shandarsingh hi te (4) ih, thinlung an pek dan kan zoh asile -

Joshua le Caleb:       Moses in Kanaan ram thlingthlatu ding ah a thlah mi (12) sungah a tel vemi an si. Mi (10) te cun, Kanaan ram mi pawl ih tum le cahzia, an tamzia pawl an hmuh tikah an t’ih ih, a do an ngam lo thu an sim. Anmah hruaitu le ticaktu, an ralpawl nehsak theutu an Pathian an rinsan nawn lo. An thinlung Pathian hnenah an pek lo ruangah Kanaan mi pawl an tihnak asi. Sihmansehla, Joshua le Caleb cun, an thinlung zaten Pathian an pek ih an rinsan ruangah Kanaan ram mi pawl cu ziang tluk in tamin tumin cak khal hai sehla, kan Pathian in in pek cia zo mi an si, Pathian caknak rinsan in zumnak thawn kan do ding,  Bawipai hmin in ram cu kan lak thei hrimhrim ding asi an ti ih ralthazet in Pathian an rinsan thu an phuang. Curuangah Egypt ram ih a suak cia mi Isreal mi 600000 lenglo sung ihsin, Joshua le Caleb lawng Pathian in Kanaan ram luh theinak nun saunak a pek asi. Pathian hnenah thinlung a pe lotu pawl cu Kanaan ram an thlen hlanah an thi thluh asi. Zohthim an va tlak em, Joshua le Caleb ih nun cu.

Zohthim tlak, Paul:           Cu, biaknak lam Dr leh leitlun fimnak lam Dr, Dr degree (2) a ngah, Juda pawl hruaitu sang Farasi pakhat, mifimtak asi. Jesuh dotu le Kristian pawl that cimit duhtu khal asi. Kristian hrem dingin a feh laiah Damaska khaw hnarah Jesuh in a tleunak in a sun ih AW khalin a biak, cuihsin a nun a thleng ih  bawipai hnenah a thinlung a pek thluh tu khal asi. Bawi pai  hnenah a thinlung a pek hnu ahcun, a hlan ih a rak uarzet mi Leitlun ropit sun lawinak le a fimthiamnak pawl hmuahmuah cu hnawmhne tluk ah a ruat. A dodal mi Jesuh cu , ka bawipa le ka pathian ati ih, A nun cem tiangin Jesuh t’antu, Thuthangtha simtu, thlarahlo kaitu, ram la tu  Pathian  mi hman ropitak  ah a cang.  Nupi khal a nei lo. A thinlung zaten Bawipa a pek thluh ruangah asi. Jesuh ruangih a tuarnak pawl cu, laksawng thatak dawng tluk in a ruat ringring theitu asi. A va ropi em!

Sadu Shandarsingh:          Jesuh a tong hnuah, Hindu biaknak  tlan san in Kristian ah a lut mi asi.  A nulepa in Kristian na bansan ih Hindu ah na kir sal asile  kan ro hmuahhmuah kan lo pe ding, na bansan lo asile kan lo that ding, na duhduh hril aw  an ti. A duhbik mi fala mawizet khal in I duhtaktak le Hindu ah ra kir sal aw la kan nei aw ding ati.  A miphunpi le Hindu puithiam upa pawl khalin nasatak in an lem rero. Sihmansehla Sadu Shandarsingh cun ka thinlung hmuahhmuah in ka bawi pa Jesuh ka pek thluh zo asi,  nan duhnak lo thluntu ding thinlung dang ka nei nawn lo a ti ih an thu a el pit thluh ruangah, an thin a natuk ih a rawl ei ding mi ah thihsii an rawi ih an eiter nan a thi lo. Pathian in a kil. A dam sal tikah a nu le pa ih hlonkhak tiangin a tuar. A thih tiang rin um in Jesuh dung a thluntu asi. A nulepa ih ro, a duh mi fala, an miphun sakhua ropitnak pawl hmuahhmuah hnakin Jesuh dungthlun dingin a thinlung zaten a pek asi. Haleluiah, Amen.

Thunetnak:     

Pathian hnenah thinlung a pektu taktak pawl cun leitlun thil ah an buai nawn lo, Meisa le sahrang, thihnak ramhuai khal an tih nawn lo. Sum le pai le lennak pawl khal thupi ah an ruat nawn lo. Pathian mithmai an zoh ih Thuthangtha sim, Setan ral do ih thlarauhlo runsuah le Pathian ramlak kau ding ta rori hi an atcilh asi. Kan thinlung zaten Jesuh Krih kan pek ve theinak dingah Pathian in a thu mal sawm hramseh. Amen!