Veikhat lai ah khuapi zet pakhat a um. Cuih khua saklam ah a danglam zetmi tlakrawh thawn dawlmi hauhruang tum zet a um. Ziangtik lai caan ah zo pawl in an dawl, an sak ti khal zohman in an thei lo. Ziangtluk in a rei zo ti khal a theitu an um lo. Cuih hauhruang dunglam ah ziangmi thil pawl an um ding ti hi zozo khalin an thei duh zet. Asinan zohman in an zingzoi ngam lo.
Hauhruang dunglam ah ziang a um ding ti a thei duh ih hauhruang tlun a kaitu pohpoh cu a kirsaltu an um nawn lo. Hauhruang parah cun nuam zet in an um, aipuang zet in an au ciamco ih khatlam ah an dawp ṭheh. Cutiih a dawptu pawl cu ziangtik hmanah khua lam ah an tlungkirsal nawn lo.
Curuangah zohman an zingzoi ngam nawn lo. Culaifang ah mi pakhat in khuasungmi pawl hnenah, “Ke hi hri thawn ṭem in hauhruang parah kai ding a si. Hauhruang par thlen tikah khatlam ah ziang a um ti kha fiang ten zohhliah ding. A zoh ṭheh tikah khatlam ih dawp nawn lo dingin hri thawn dirh ding a si,” tin ruahnak a pek.
Cutin ruahnak a pek ṭheh tikah khuasungmi pawl hnenah, “Zo si hauhruang parah kai ding?” tin a suh tikah nunau pakhat in, “Keimah ka kai ding,” a ti. Curuangah cuih nunau cu a ke ah hri an ṭem ih hauhruang parah cun an vun kaiter.
Cuih nunau cu hauhruang par a thlen tikah lungawi le aipuang zet in a au. Cuṭheh in a kut pahnih a pharh ih khatlam ah dawp dingin a tim a tuah aw. Asinan khuasungmi pawl in a ke ih ṭemnak hri kha nasatak in a dirthlak tikah khatlam ah a dawp thei lo.
Khuasungmi pawl in cu nu hnenah, “Khatlam ah ziang si um. Ziang si na hmuhmi um?” tin an sut ciamco thlang. A danglam zetmi pakhat cu cuih nunau in kam khat hman simrel ding a thei lo. Culawng si lo in mi-aa vek ah a cang.
ZIRH DUHMI
Leitlun ahhin hmuhmi simfiang thei lotu, hmuhmi phorhsuak thei lotu, hmuhmi ziang a si ti langter thei lotu tampi kan um. Cun leitlun ahhin simfiang le phorhsuah a theih lomi thil tampi an rak um.
Ref: Sarpay Uhyin
Lairawn Meifar
(45/2018)
Lairawn Meifar
(45/2018)
No comments:
Post a Comment