ARTI PUMKHAT ZIANG ZAT SI?

Veikhat lai ah nupinu pakhat cu rawlhmeh, tihang ding le thil ṭulmi dangdang lei dingin bazar ah a feh. Arti zuarnak hmun ah a thleng ih arti zuartu putar hnenah, “Ka pu, arti pumkhat ziang zat si?” tin a sut ih putar in, “Aw, arti pumkhat cu Ks.100 si ko,” tin a let.

Nupinu:

“Cuti asile pumhra ka lei dingih Ks.900 in in pe thei pei maw. Na siang lo asile cu hmundang ah ka lei ding.”

Putar:

“Si ko. Tui ni hi nidang thawn a bang aw lo nasa. Zing ihsin tu tiangah pumkhat hman ka zuarkhawng hrih lo. Ziangkhalle pumhra cu Ks.900 in ka lo pe men pei cu aw.”

Cutin putarpa in arti pumhra kha Ks.900 in nupinu cu a leiter. Nupinu cu arti pumhra cu a lak ih, arti man ka neep ngah riai e tin diriam phah nawn in arti zuartu putarpai’ hnen ihsin a suak. Cuihhnu nazi pakhat hrawng a rei ih arti leitunu cu rinlopin a rualnu thawn lamzin ah an tong aw dukci. A rualnu thawn an tonawk-lonak a rei tikah a rualnu in ei theih thil pakhatkhat do dingin a ngen.

Nupinu khal cu a duhdawt zetmi a rualnu ih dilngennak cu el siang lo in rawldawrpi zet pakhat ah a fehpi. An duhmi rawlhmeh thawthaw le thil dangdang an cah ih thunuam rel phah in an ei. Nung thei le neinung ve deuh an si ruangah an cahmi rawl kha malte lawng an ei. An eimi hnakin an taanmi (ei lomi) a tam sawn.

An ṭheh tikah a zate a cem dingmi cu Ks.19400 a si. Curuangah dawr neitu hnenah Ks.19500 a pe. Asinan a hleimi dingmi Ks.100 cu dawr neitu hnenah uar aw nawn tak in, “In khirhsal duh nawn hlah. Khatikhan um mai seh,” tin a ti ih a rualnu thawn rawldawr ihsin an feh.

A ngaingai ti ahcun a hleimi paisa Ks.100 a khirhtersal nawn lomi hi dawr neitu hrangah zianghman simrel tlak a si lo. Asinan rethei le farah ruangih arti zuartu putar hrangah cun a sunglawi zetmi a si.

ZIRH DUHMI
(1) Mi in harsa zet in ti ṭenṭo ten thil an zuarmi kan lei ding tikah zoh mawi lo tiang cun a man neep lo sehla a ṭha.

(2) Bom ding ṭul pawl hnenah pe ngah lo in, bom ṭul lomi pawl hnenah kan pe rero sawn pang ding hi phan a um nasa.

(3) Milian hrangih a thawhhlam man khi mifarah hrangah a thaithawh le zanriah man a si.

THUSUHNAK
(1) Rethei le harsat tuk ruangah le pumcawmnak ding hrangah tin bazar ih thil a zuartu pawl hnenih thil kan lei tikah ziangruangah thilri man a tam tuk tin kan neep duh ciamco ṭheu? (Thilri man a luan tuk ih zuarmi cu neep khal a ṭha ve ko. Asinan a miat ziangzat hman an ngah lo dingmi parah ziangah kan neep duh rero).

(2) Kan siannak le kan peksuakmi a ṭul lomi pawl hnenah ziangruangah tirhsiang zet in ka pek duh rero ding?

Hram: Lawkanite Thuta Sarpay
Lairawn Meifar
(24/2018)