CAAN KHEEL LO FALANU

Veikhat lai ah company pakhat ah fala pakhat cu hnaṭuan in a um. Company ti cu tikcu caan hman zet ih hnaṭuan an si ruangah tikcu caan tlai/kheel lo tivek a ngah lo. Kheel lo ahcun paisa kuanter a si.

Nikhat cu falanu kha hnaṭuannak a baang tuk ruangah zinglam hnaṭuan feh a tlai pang. Company a thlen tikah manager in sangkapi hmai ah a rak hngak ringring. Falanu cun manager a hmuh veten thinkhur phah cing in, “In ngaithiam aw. Ka itthat pang ruangah hokhaw,” tin zangfah a dil. Manager cu zianghman ṭong lo in a lu a rak sut men.

Zungkhan sung a thlen tikah falanu cu a thin a nuam thei cuang lo ih manager kha a thinheng ding ti a zum ruangah hitin a simfiangsal: “Mizan ah rinlopin mikhual ka nei ih a ṭulmi tete pawl ka tuahsaknak ah ka it tlai pang.” Cumi khalah manager cun kamkhat hman ṭong cuang lo in a lu a rak sut lala.

Falanu cun manager hi ziangtluk a thinheng ti cu a mithmai umdan in a theifiang nasa. A hrangah cun thlaphanza ngaingai a si. Cutin a neta biknak ah tin company a thlen tlainak thu kha a simfiangsal: “A ngaingai ahcun ka tlai lo ding nan. Tui ni hi ziang a cang maw ka thei lo. Tlangleng colhnak hmun ah minung an tam tuk. A pathumnak tlangleng lawng ka to ngah fangfang.”

Manager cun nazi a zoh ih, “A ngaingai ahcun minit pathum lawng na tlai. Atu cu minit paruk a si lala zo. Hivek cu a caan caan ah a um ṭheu ko. Tikcu caan na tlai hi na sual ti ka lo hmu lo. Asinan tu cu minit paruk na tlai zo. Daan ka lo taat ding ruangah na thlahlawh ihsin dollar $5 ka dir ding. Cun in simfiangnak pawl hi ka ruah rero tikah nang hi mai’ sualnak/palhnak cohlang aw duh lo pakhat na si ti ka lo thei,” a ti.

Cutikah falanu in, “A si lo. Ka tlai hrim a si lo ti thu ka lo theifiangter duh ruangah hokhaw, manager,” tin a simfiangsal. Manager in, “Na tlai hrim a si lo ti ka lo theithiam. Minung timi cu pakhatkhat kan ti palh tikah ka palh a si ti kan cohlanawk ding a thupi. Ka palh ti ih na cohlanawk hnuah na tuah dingmi kha tuah cih ding na si. Cucu palhnak parah a ṭha/dik bik cohlanawknak a si. Cuti si lo in cumi ruangah, khami ruagnah, himi ruangah ti vekin simfiang ciamco a ṭul lo. Cuih na simmi cu a dik siseh, dik lo siseh a liam ciami an si zo,” tin awkam hraang nawn in a sim ih a suaksal.

Falanu cun, “Hnaṭuan caan ka tlai ruangih dollar $5 pek dingih daan in tatmi hi ka nunnak ah zirhtu ṭha bik pakhat a si. A sunglawi tuk,” tin a sim.

MANAGER SIMMI
(1) Na palhnak/sualnak parah theifiang dingin simfiangnak na tuah tam asile palhnak a tam deuhdeuh ding. 

(2) Kan palh, kan sual a si ahcun lung thiangte in “Ka palh ngai” “Ka sual ngai” tiih cohlanawk mai ding. 

(3) Caan bikhiah nei ih thil tuah ding kan nei ih kan tlai ding asile hotu pawl le ṭuanvo neitu pawl hnenah tikcu caan kheel ten phone thawn sim le dil ding a si.

Hram: Lawkanite Thuta Sarpay
Lairawn Meifar
(25/2018)