Mai' Nunphung (Culture) Sunloih Thiamtu Kan Si Maw?

Kan PiPu suahseemnak Lairam (Chinland) hi thuhla phunkim ruangah kan suahsan cio. Ram dang, Miphun dang le Nunphung dang karlak ah a tul daan ih zirin kan nung- cang, khua kan sa!

Hrilmi Miphun (Elected Nation) kan si, tiih a ruat awtu Israel mi in tuni hmuntin ah an nunphung - tong le calai - san thuanthu (tradition) an thlauthla lo, tesin fapar an simzirh aw, an roh aw ta. 

Lei san cem tiang nunphung kilkhawi theitu miphun tiih hminsin an si ko ding. Hebru ca mi fim mi thiam deuh cin cun an zir rerolai.

Laimi (Chin) teh kan Nunphung (Culture) hi ruahnak bizet neitu pawl ih aukiomi kha ruat ttha cuca taa lo men in khuasia (satan) taa kan ti ve pang maw? Kan thlennak ram le miphun pawl ih nunphung ih dolhhlomi le mi vaivuan hnamtlau kan si ve pang maw?

Kan Pipu ih thuanthu le hla [traditional song] kan hngilh maw?

"Nan hrangah tumtahnak ka neihmi cu keimah lawng in ka thei" {Jerimiah 29:11} hi ziangti vekin na nunnak ah na hmang lut? Laimi hrangah Pathian tumtah hi miphun hlo, mai' nunphung le pipu thuanthu hngilh le ziang siar loih um ding a si ka zum lo.

Bible sungih Pathian riantu mi maksak pahnih ka uartuk hngai: 

1) Moses: A Miphun a duhdawttuk ih amai' nunnak a caan/sungral ngam [Suah. 32:32]: ".... ka hmin kha phiat sawn hram aw," a ti.

2) Paul: A Miphun a duhdawttuk ruangah a sungral ngam ve [Rom 9:2-3]: 

"...keimah sawn ... Pathian camsiatnak hnuai ih ummi sisawn ningla" a ti vulvo ve mai.

Pathian ih in rundamnak sunglawi cu pumhlum rundamnak [holistic salvation] - thlarau thinlung taksa rundamnak - a si. Cumi sungah nunphung - tong le calai - a tel cih thluh.

Khuahlan deuh Laimi pipu pawl in, "Lushai tong ih thlacam lawng Pathian in a ngaisang" ti'n an rak ruat dah, [simsinmi ka thei dah]. Tuihsan Laimi tampi in "Mirang tong hi Pathian thluasuah hleice ti'n kan ruat ve pang pei, ti ka phaang (thungai te'n).

American President maksak Dwight David Eisenhower (the 34th) in, "Kei cu American mi sinak in ka suak, American mi sinak in ka thanglian ih American mi sinak ka thihpi ding," a ti. Ka va uar em. 

Kei tla Laimi ka si, ka si ringring, ka si vingvo lai hrih ko ding.

Mai' Nunphung kilkhawi theitu kan sinak dingah Laica Zir uhsi!
Laica Thiam uhsi! Laica Hmang uhsi! Lai HLA te SAK cio uhsi!
Bulpak nun ah, Innsungsang ah, Biakinn ah le Khuatlang nun khal ah!

Kan Fahniang pawl le kan tunu tupa pawl tla kanmai’ Lai khuahlan HLA te thawn AWI uhsi!