ZIANGRUANGAH THINNAU IN KAN UM?

Minung kan si vekin leitlun kan nundam sung caan tawite ah riahsiatnak, thinnaunak le beidonnak a tong lotu zohman kan um lo ding. Hivek caan ah mah le mah thazang pekawk thiam ding hi a thupi ngaingai.

(1) MADONNA
Madonna hi leitlun ah a thei lotu kan tam tuk lem lo ding. Hlasak thiam le hmel ṭha milar zet pakhat a si. Awnmawi khawvel ah leitlunpi theih ding tiangih hlasak thiam milar a si theinak hi ol te ih a ngahmi a si lo. A nauhak lai ah an farah tuk ruangah a rilrawn tuk tikah a baal zetmi hnawm-bawm sungih hlonmi hmuk pawl sar in a rak ei ṭheu. Asinan an farahnak in a nunnak a tlaniamter thei lo. Rethei farah zet hmanseh nasatak ih a zuamnak ruangah hlawhtlinnak sunglawi tak a ngahsal thei.

* Rethei le farah zet tla kan um men thei. Asinan Madonna vekin hnawm-bawm sungih hlonmi hmuk/rawl kan ei dah maw? Kan ei dah lo a si ahcun Madonna tlukin kan dinhmun a sia hrih lo; kan farah hrih lo.

(2) ABRAHAM LINCOLN
American rampi ih President lakah mi ih theih tam bikmi le hminthang zetmi Abraham Lincoln hi kan thei cio ko ding. A nauhak lai ah farah zet an si. A pa hi zanthing hau ih hnaṭuan a si. An umnak inn hman hi inn tiih kawh ding hnakin thlamte tiih kawh sawn ding tiangin a sia zet. Ca zohnak ding letṭhik meisa hman nei lo dinhmun le cangannak ding cafang hman nei ṭhiṭha lo dinhmun ihsin a tumruhnak le a tumtahnak ruangah beidong lo ten a zuam ṭenṭo ih American President tiang a thleng thei. Nauhak lai ah thlamte vek fang a simi inn siate ah um khal sehla a zuamnak le a taimaknak ruangah a mawi le a ropi zetmi American President innpi hngaktu ah a cangsal mai.

* Abraham vekin cazohnak ding meisa nei lo in kan um maw? Kan umnak inn hi teh thlamte vek fang inn siate ah maw kan um? Abraham vek ngai cun cazohnak ding meisa nei lo le inn siate hngaktu cu kan um tuk lem lo ding. Taimak suah ṭenṭo ih kan zuam ahcun kanmah le sinak/dinhmun tawk ah kan pitling thei a si.

(3) U THANT

Myanmar rampi hi leitlunpi ih theihmi si dingah le UN Secretary tiang rak ṭuantu U Thant tla hi Pantanaw khawpi ih tlawng saya pakhat a rak si. Asinan tlawng saya pakhat ka si ti ruat aw men lo in thungai thlak le nasatak ih a zuamnak ruangah leitlunpi ih theihmi mifim mithiam ah a cang ih, UN Seretary tiang a ṭuan ngah thei. UN Secretary a ṭuan lai ah leitlun ah ralpi tho ding dinhmun tiang a um nain, a thuruah thiamnak le a fimnak in a daitersal thei. 

* Tlawng saya/ma pakhat men ka si tin thinnau le beidon ding zianghman a um lo. Kan zuam vivo a si ahcun dinhmun sang kan thlen theinak lamzin tampi a um. A thupi bikmi cu cawl lo ih kan zuam ṭenṭo ding hi a si.

Mi hlawhtling pawl hi an nui’ pum sung ihsin an suah thlak ve ten hminthang cia le hlawhtling cia zohman an um lo. Minung lakih minung an si ko. Beidong lo le cat lo in nasatak ih an zuamnak ruangah leitlun ah hlawhtling le hminthang ah an cang. Kannih khal leitlun ah a hlawhtlingmi le mi tampi ih theihmi kan si theinak lamzin tampi a um ve. Beidong le thanau zet ih kan um cuahco rero lai ah in zuamtu le kan zuammi pawl cu nasatak in an zuam rero. Kan hmai ah an feh rero zo. Beidonnak le thanaunak cun kan theihthiam lo tikah nunharnak ah in hruai ih, asinan kan theithiam ih zuamnak le ṭanlaknak ih kan hman thiam ahcun hlawhtlinnak cotu ah in tuah thei a si.

Hram: Lawkanite Thuta Sarpay
Lairawn Meifar
(52/2018)