TILI PARIH TIMAN (By-Lairawn Meifar)

Veikhat cu ramtawi paih zet mi pakhat cu amah lawng hramlak ah ramtawi in a feh. Sun niling lakah a tawi a vah rero tikah a ti a hal tuk ih tidai in ding a hawl. Rei hman a hawl man lo, vanṭhat ah a kiang naite ah tili pakhat a tong dukdi. Tili ih tidai in ding cun a vung ṭum ih tidai a zoh tikah tili/tidai parah timan le thinghneh ti vek pawl lawnglawng a hmu. Curuangah cuih ramtawipa cu a ti a hal zet nain, “Hivek tili ṭha lo, timan lawnglawng ih a khat si,” tin a ti ih a ratnak lam ahcun a kirsal cih. 


Cuih ramtawipa cu rei lo sungte ah a ti a halsal. A ngaingai ti ahcun ramtawipa ih ruahdan vek a rak si ta lo. Tidai/tili parih ummi cu timan pawl lawng an si. Cuih timan hnuaiah a thiang zetmi tidai a rak um. Asinan ramtawipa cun tili/tidai tlunlam lawnglawng a zoh tikah tidai tlun lam ih langmi timan lawng a hmu. Curuangah thinheng in a umnak lam ahcun a kirsal vurvo. Hi ramtawipa hi a lenglam lawng a zoh thiam ruangah sun niling lakah tihal tuar in a um cuahco. A ngaingai ti ahcun leitlunpi kan timi khal hi danglam ciamco cuangnak a um cuang lo. Minung lakah leng lam lawng zoh thiamtu kan tam tuk hi thil poi zetmi pakhat a si.


ZIRH DUHMI:

(1) Leng lam lawng zohtu pawl cu hlawhtlinnak ngaingai an hmusuak thei lo ding.

(2) Ziangkim hi a tha lam zawng ih kan zoh phot cun a thami kan hmu ding. Asinan a sia (ṭha lo) lam zawng ih kan thlir ahcun a siami lawngte kan hmu ve ding.

(3) A lenglam lawng zoh in thuṭhencatnak va tuah hrimhrim hlah.

Hram: Lawkanite Thutasarpay
(43/2018)
Lairawn Meifar