MAWṬAW LE THINGKUNG

Veikhat lai ah khawpi pakhat ah duhdaw aw zetmi fala le tlangval an um. Nikhat cu tlang parih um khuate lam ah tlawng in an feh. An tlawn caan hi furpi ruahpi tam lai fang a si ruangah lamzin pawl tla an sia. An tomi mawṭaw khal cak zet in a feh thei lo.

An tlawnnak ding khua an thlen hlan peng khat duh ah ziangkhalle kan thleng zik thlang pam an ti ih mawṭaw mawngtu hnenah ṭum ding an dil. Cutin mawṭaw mawngtu khalin, “Si ko, nan fehnak ding khua a hla tuk lem nawn lo pam. Khuacuan tla nan duh ding. Nan thu si ko. Nan ṭum thei,” a ti ih, cuih fala le tlangval cu mawṭaw ihsin an ṭum.

An ṭumnak ṭheh hnuah mawṭaw cu a feh vivo. Vansiat le malmak ah an hmai khua luhnak lamzin kapih thingkung tumtak cu a tlu ih mawṭaw kha lak tlak ding um nawn lo in a nenper reprep thluh. Mawṭaw mawngtu le neitu siseh, a sungih totu zohman nungdam in a luattu zo hman an um lo. Cuih thu cu mawṭaw neitui’ nupi in a theih tikah riahsia mitthli thawn, “Aw, minung in kan hmailam ah ziang a cang ding ti kan thei cia lo. Ziangkim parih thuneitu le theitu Pathian lairel hi theihthiam a har em. A tuardan thiam ding a ṭul tuk aw,” tin a ti.

Cun cuih thuthangsia cu khua thlen zik ih mawṭaw ihsin a ṭumtu fala le tlangval in an theih tikah an riah a sia ngaingai ih, “Mawṭaw par ihsin ṭum lo in kan rak to lan sehla a ṭha tuk ding nan,” tin khuasungmi pawl hnenah an ti.

Cutikah khuasungmi pawl in, “Nan vanṭha tuk hokhaw. Mawṭaw sungah um uhla nan thi ve ding. Khua thlen hlanih nan ṭum kha nan thiam. Nan ṭum fuh tuk,” tin an ti. Asinan fala le tlangval cun khuasungmi pawl ih simmi parah an lungkim lo ih hitin an sim: “Mawṭaw par ihsin kan ṭum lo sehla a ṭha tuk ding nan kan timi cu hitin a si. Khua thlen hlanih kan ṭum ruangah mawṭaw kha lamzin ah a cawl lawk. Kan ṭum lo sehla a cawl lo ding. Cutin lamzin kapih thingkung in mawṭaw a nenper ngah lo ding. Mawṭaw a luat ding,” an ti.

ZIRH DUHMI
(1) Ziangkim hi Pathian khawkhan lairelnak hnuaiah a um ko, asinan kanmah ruangah mi in vansiatnak le vanduainak an ton tikah zawnruahnak neih hi a thupi.

(2) Mi ih vansiatnak le tlaksiatnak an tonnak hmun ah himdam te ih kan um tikah vansiat a tongtu pawl parah zawnruahnak langter ding a si. 

(3) Leitlun ah a langte ih khualtlawngmi kan si. Kan tumtahnak le kan feh duhnak hmunram kan thlen hlanah a cem theimi kan si. Ziangvek dinhmun kan thlen khalah a tuardan thiamtu kan si ding a thupi.

Lairawn Meifar
(54/2018)