Caan a her ih thla ruk hrawng a liam, minung lam ih ruahbanlo leh duh umlo zet thil a thleng tariai. An suan emem mi leh fala hmanih an ruah hrihlo mi an fanu te cu nau a pai ti a si ngelcel. A theitu hmuahhmuah an mang a bang, an khawruah a har thluh. A nu le pa cu an lung a kekkuai ding sikhawh ti ruat
phah in an inn ah ka hung lut. An nupa in ihnak khan sungah an um ih rawl khal an eilo, zan khal an itthat thei ding ka zum lo. Ka zoh hai ih biak dan ding khal ka theilo. Asinan zantin ka hung leng ih thudang pipi ka rel pi phah theu. Cutin zarhkhat hrawng a hung liam hnu ah anu ih i simmi cu tuini tiangih ka hngilh theilomi le thazaang ka lak ringring mi tongkam ropi ka timi cu ka lo hlawm duh haimi asi.
Hitin i sim; "kan tonmi hi kan hlanah mi tampi in an rak tong zo ih tu ah kan nih in kan beiseilo pi in kan tongve, hmailam khalah midang a tongtu an um rero lai ko ding. Thil thabik hi kan tlun ih thleng dingin kan duh cio nan, thil thalo khal kan ton dingmi a si ve thotho. Kan duh lo bikmi thihnak tiang hman kan tonglai ding ti ka fiang zo ih ka tuarthiam zo sokhaw" tiah i ti. Tuarnak makzet lak in hiti ih i hun sim hi cun mak ka ti tuk, ka upat in ka ngaisang tuk. Caan tampi ah ka thinlung ih langsuak sal theumi a siih ka thinlung ah thu ruah ding khal i neihter theu.
Kan fahniang le hi kan duhdawttuk ruangah hringtu nu le pa hrang ahcun midang hnakin kan mit ah an mawi tuk, an fim an fel cuang in kan hmu ih an simmi hmuahhmuah cu a dik thluh in kan ruat theu. Cumi cu caantha ah lak in kan fa le in thilsual tuahnak ah an hmang ve theu.
Curuangah himi thu thawn pehpar in thu ka lo sut ve duh.
1. Nu le pa in fa le kan duhdawt tuk hi a sual maw si?
2. Nu le pa ih duhdawtnak hmangsualtu fale ih mawh maw a si?
3. Kan leilungpi siatralnak caan a nai hrimhrim ruangah sawn maw a si pei?
No comments:
Post a Comment