Leitlun ih mawṭaw hmuahhmuah lakah a khohkhah bik a si ih US President pahnih lawngih to hrihmi mawṭaw khal a si. Atu US President ṭuan rerotu Donald Trump in President hlun Obama ih tomi “The Beast” tiih mi tampi ih theihmi “Cadillac One” mawṭaw thotho a hmang peh vivo ih himi mawṭaw thuhla thawn pehparmii theih ṭha tete (10) kan hlawm aw hnik pei.
(1) One model ah Duramx timi 6.6 litre hmanmi V8 engin an bun ih Supercharged sanit (system) ih hmanmi Diesel Engin an bun. 2009 January 20 ni ah President ih tomi mawṭaw si dingin an hmang thok ih, Obama kut sungih hman thok a si.
(2) One hi pound 14000 tiang a rit. Kan theih olnak dingah a hminthang zetmi Toyota Camry mawṭaw hi pound 3200 lawng a rit. Hitlukih a ritnak san cu mawṭaw ah hriamhrei tivek pawl an bun ruangah siseh, mawṭaw body hi steel, alumium, titanium le ceramic pawl thawn tuahmi a si ruangah a si.
(3) One ih luhnak sangka pawl hi tawh onnak ding a ong a um lo. President mawṭaw thluntu ding an timi kilhimnak lam ṭuanvo latu (security) pawl lawngin mawṭaw sangka ziangtin on ding ti an thei.
(4) Mawṭaw hi letmah-5 hrawng a sahmi cerek kham theimi thilri an bun. Culawng si lo in thli baal thianternak khal an ret cih ih chemical thilri pawl kham theinak thilri pawl khal an ret cih.
(5) One model hi dungci (missle) thawn kah khalih kham theinak a nei. Mitthli for theinak bomb le meisa meithal thawn khalih kah le do theih lo a si. Diesel umnak rori hman meithal thawn ih kah-tlang theih lomi a si.
(6) One model ahhin President ih thisen thawn a bang awmi thisen retnak bawm pahnih a um. Cun cakkhai ih hman dingah oxygen ih bomnak ngah thei ding khalin tuah cih ṭheh a si.
(7) One hi leitlun khui hmun khalah phone line a ngah ṭheh thei. Video Conferencing timi “Zuk lang, aw thei ih meeting” khal mawṭaw to phah cingin meeting tuah a theih.
(8) Bomb puak tivek khal kham thei dingin mawṭaw hnuailam ah Kevlar timi khamnak thil phunkhat an ret ih, bomb puak tivek pawl hi ṭha ten a kham thei.
(9) Mawṭaw ih taya hi Kevlar system a tel. Curuangah thli a um lo caan khalah thli um vek thotho in mawn a theih. A netnak taya a um nawn lo hmanah bing-khui lawng khalin mawn a theih thotho.
(10) September 11 ni US ih World Trade Center tonak a ton hnu a hmaisabik tuahmi le hmanmi One model hi a tak in hniksaknak an tuah ih an siatbalsal ṭheh. Cuihhnu a ṭulsammi le tlaksamnak pawl an remṭhat hnuah a hlanih tuahmi vek cekci One model hi an tuahsalmi a si.
Source:Myanmar Update News Agency
Lairawn Meifar
(38/2018)
(38/2018)
No comments:
Post a Comment