Japan ram ih um Myanmar mi innsang pakhat cu an fapate kha tlawng pakhat tlawng an kaiter. Nikhat cu an fapate khan ih tlawngta pakhat cu a paisa bawm a hlo. Cuih paisa bawm sungah Yan 8000 (Ks.100000 zikte) a um.
Paisa hlo thu thawn pehpar aw in tlawng saya le sayama pawl in ziangtin an zingzoi ti kha tlawngta (Myanmar mi) ih nu le pa in theih an duh tuk ruangah an fapate hnenah an sut. Asinan a nu le pa ih thusuhmi a let hlanah an fapate in a nu le pa hnenah, “Kawlram ah sisehla ziangtin an zingzoi ding?” tin a sut.
Cutikah a nu le pa in, “Aw si, Kawlram ah hivekin tlawnginn ah paisa hlo um bang sehla tlawng saya/sayama pawl in hitin an zingzoi ding:
(1) Saya/sayama pawl in tlawngta zate ih tawngphu/zaal ong ṭheh uh an ti ding. Cun tlawngta hotu pawl in tawngphu/zaal pawl kha an cek ding.
(2) Hinu/hipa in a ru/fir a si ding tiih an zummi tlawngta kha tlawng-uktu zungkhan sungah an ko dingih thu an sut ding.
(3) Culo asile a rutu zo a si ti kha a thupten an sut ding.
(4) A rutu kan lo theih asile nasatak in kan lo thawi/vuak ding, tin an ṭihṭhaih ding.
A nu le pai’ simmi a ngai ṭheh hnuah an fapate cun, “Aw, cutin maw an ti ding. Asinan kan sayapa cun cutin a ti lo,” a ti. “Cuti asile nan saya/sayama pawl in ziangtin an zingzoi?” tin a nu le pa in an sutsal ih an fapate in a hnuailam vekin a let.
“Kan sayapa cun thu tampi tla a sim lo. Hitin tawite in sim: A hlomi paisa kha Yan 8000 a si. Khah asile cuih paisa Yan 8000 kha a rutu/firtu ni ziangzat a hmang ding. Ni khat maw, ni hnih maw, asilole zarh khat maw…paisa firtu in cuih paisa a hman tikah a thin a nuam pei maw? Lungawi le nuam zet ih na hman rero lai ah paisa hlotertu na rualpi kha a tawngphu le a paisa lawnglawng ruat in thinhar le beidong zet in a um ding ti na ruat ngah maw? Na thinlung a thiang maw? Zawnruahnak thawn paisa hlotu nan rualpa ih mithmai khi vun zoh hnik uh. Paisa ngahsal theinak dingah tin ka lo simmi a si lo. Leitlun nan dam sung hrang ka lo simmi a si. Atu ah minit (10) colh caan ka lo pe ding. Himi colh caan sungte ahhin tlawnginn ah zalen le nuam zet in nan um thei. Minit (10) a kim tikah khan sungah nan lut dingih cazir kan thoksal ding.”
Cutin tlawngta pawl cu anmah le nuam ti dandan in an lek. Minit (10) a kim tikah khan sungah an lutsal. Paisa hlo ruangih thinhar zet ih umtu tlawngta ih but (shoe) sungah paisa Yan 8000 cu rinlopin an hmusal.
Hi Japan tlawng sayapa ih paisa Yan 8000 hlomi ngahsal dingih a zingzoidan hi a mak nasa. Phundang in kan sim asile Moral Education a hmanmi in tlawngta pawl thinlung le paisa firtu tlawngta ih thinlung a tong nasa.
CAWN TLAKMI
(1) Zawnruahnak lungput nei dingin nauhak pawl hi kaihruai thiam ding a thupi ngaingai.
(2) Cuih zawnruahnak lungput cu nitin kan nunnak ah nunpi cih rori a ṭul.
(3) Palhnak a neitu cu mi hmaiah na palh tiih ti hnakin amah ten a palh zia thei awter dingin zirh thiam ding a ṭul.
Credit: Yu Miko (Lawkanite Thuta Sarpay)
Lairawn Meifar
(34/2018)
(34/2018)
No comments:
Post a Comment