SAYA LE TLAWNGTA (By-Lairawn Meifar)

(Kan tuahmi le kan hmuhdan hi a dik taktak ahcun midang khalin a dik tiih an hmuh ve theinak dingah tuah/simfiang a ṭul).....Veikhat cu tlawng saya in tlawngta pawl lak ihsin a duhmi pahnih hril in a ko ih a tonak cabuai hmaiah a toter ih cafang pakhat a nganter.

A hmaisa ah tlawngta lak ihsin Thuante a ko ih a hnenah, “Khale… Mirang cafangte ‘u’ vun ngan hnik aw,” tin a fial. Thuante cu zamrang zet in ‘u’ a ngan ih sayapa a hmuh lohli. Asinan sayapa in, “Na nganmi a dik lo. Mirang cafangte ‘u’ ngan aw ka lo ti, ziangah ‘n’ na ngan,” a ti ih naa tuk lem lo in a kut ah veikhat in a vuak. Thuante cun sayapa ih fial vekin ‘u’ kha dik zet in a ngan. Asinan vuak a tong. A ruangah cu sayapa lam ihsin zoh tikah ‘n’ cafang a rak si.

Cuihsin tlawngta pakhat Cungte a ko ih a hnenah, “Khale… Mirang cafangte ‘u’ vun ngan hnik aw le,” tin a fial ve. Cungte cun zamrang zet in ‘u’ a vun ngan. A ngan ṭheh tikah a ngannak cahnah kha a her ih sayapa hnenah a hmuh. Sayapa in a zoh ih “Na nganmi a dik. Na thiam riai,” tin a lawm.

Himi Mirang cafangte ‘u’ ngantermi ahhin ruah ding pakhat a um: “Ziangvek thil pohpoh ahhin ‘Angle of Version’ timi ziangkim hi kilkip in thlir/zoh theih” timi hi a si.

A ngaingai ti ahcun tlawngta pahnih in Mirang cafangte ‘u’ an nganmi hi a dik veve. Asinan Thuante ih nganmi cu a dik lo tin sayapa in a cohlang thei lo. Ziangahtile Thuante in amai’ hmuhnak lam in sayapa hnenih a piah ruangah a si. Asinan Cungte cu sayapa lam ihsin zoh tikah ‘u’ tiih hmuh theih dingin a ngannak cahnah kha a her. Cutikah amah Cungte lam ihsi cun ‘n’ cafang ah a cang nain sayapa lam ihsin zoh tikah cun a ngantermi ‘u’ a rak si.

ZIRH DUHMI

(1) Thuhla hrekkhat pawl hi kanmah lam ihsin zoh le thlir tikah a dik men thei; asinan khatlam ihsin zohdan le thlirdan ah a dik lo tla si men thei. Curuangah thuhla pakhat hi a cang thei tawk in kilkip ih kan thlir thiam ding a ṭul. Culawng ah pakhat le pakhat karlak ah a dikmi kha fiangten a lang thei dingih, kan cohlang aw thiam ding. 

(2) Cuti si lo in ‘Kanmai’ hmuhdan hi a dik bik tin hmuhnak fiak tuk thawn zoh ih kan elawk rero men a si ahcun kan thlen duhnak hmun hi ziangtik hmanah kan thleng thei dah lo ding.

(3) Kanmai’ lam ih kan hmuhdan a dikmi kha khatlam khalin dik zet ih an hmuh thei dingin tuah le simfiang a ṭul ding.

Hram: Lawkanite Thuta Sarpay
Lairawn Meifar
(31/2018)