NAUHAK NUNSIMNAK CAAN (By- Lairawn Meifar)

Nauhak pawl hi ziangvek caan ah nun kan sim ding, kan zirh ding ti theihfiang ding a thupi zet. Curuangah nauhak nun kan sim tikah CAAN hi hril fuh thiam ding a ṭul zet. Sim le zirh ding caan ih kan sim/zirh fuh lo tikah ṭhatnak lam pan lo in an sual deuhdeuh thei; asinan CAAN kan hril fuh ahcun malte kan simmi/zirhmi khal hi hmuar a nei ih, an nun pitlingtertu ah a cang. A hnuaiih tarlangmi pa (5) pawl hi nauhak nun sim/zirh ol bik caan pawl an si.

(1) Hlawhtlin Caan

Camibuai on caan le zuamawknak ah laksawng pakhatkhat ngah caan tivek ahhin nauhak pawl hi an lungawi a awi thei zet ih, an tha khal a tho thei ngaingai. An thinlung sangka kau zet ih an on awk laifang caan a si. Curuangah himi caante hi hringtu nu le pa in thupi zet ih rehsak thiam a ṭul. An hlawhtlinnak parah hminsinnak langternak thawn lawm in, lungawi thusim ding. Cumi rualrual in hmailam khalah zuam sinsin ding le tu hnakih thiam sinsin dingin thapeknak thawn kan kawm thei asile zuam duhnak lungput thawn a khat dingih hmailam ah a hlawhtling vivo ding.

(2) Paihnak Lungput Neih Caan

Paihnak/Hiarnak (Interesting) hi zirhtu saya ṭha bik a si. Nauhak pawl hi thil pakhatkhat kha theih duhnak le tuah duhnak thinlung za ah za a neih asile hringtu nu le pa in thapek thiam ding a ṭul. Ziangahtile himi caante hi thil pakhatkhat theih hiar duhnak a neih laifang a si ruangah nunsim tikah ol ten a rak hminsin thei. Anmai paihmi le duhmi pawl an tuah theinak dingah hringtu nu le pa in nasatak ih somdom thiam ding a ṭul zet. Asinan himi ah theih ṭul zetmi pakhat cu: nauhak pawl cun thil pakhat an uarnak/duhnak hi rei a daih ṭheu lo. Thinsau zet ih tuar thiam cu a ṭul ding.

(3) Midang Hlawhtlin An Hmuh Caan 

Midang pawl ih an hlawhtlinnak an hmuh tikah nauhak pawl hi an lung a awi ve thei zet. Himi caan hi hlawhtlinnak ngah thei dingin zuam duhnak lungput nei thei dingih nunsimnak ṭha bik caan a rak si. Hringtu nu le pa in midang pawl ih hlawhtlindan thuhla pawl hi nauhak pawl thawn cipciar zet in relpi ding. Na ruahdan pawl tla relpi aw. Hivekin na zuam ve asile ni khatkhat ah na hlawhtling ding hokhaw timi zum hnget dingin thapek ding. An tumtahmi tuahsuak le hlawhtling thei dingin nasatak ih tha pek ding.

(4) Tuahpalh Caan

Nauhak hi thilsual pakhatkhat a tuah ngah pang asile an thinlung hi riahsia zet in a um thei. Cuvek lai caante hi hringtu nu le pa ih an simmi hmuahhmuah olte ih an cohlan thei caan a si. A thupi bik cu nauhak in a palhnak kha ṭha ten a theihfiang ding le rem ṭulmi tete pawl simter aw. Cuṭheh in thukam later aw. Nauhak cu a thukam a thlun ding ti kha zum eueu aw. A tuahpalhmi thil ruangah ha-pi kiak zik ko in kawk rero duh hlah. Cuhnakin a tuahpalhmi kha ṭha ten cohlang aw thei ding le zuam sinsin duhnak lungput nei thei dingin zuampi a ṭul zet ding.

(5) Harsatnak Ton Caan 

Harsatnak le dawnkhamtu tivek hi nauhak pawl hrangah thinnaunak a suahpi thei. Zumnak khal a ṭumter thei. Hivek caan ah mawhphurh rero lo in theihthiam-awknak tla neih ding a ṭul. Harsatnak hi duh um lo zetmi a si nain khatlam ah kan hmuh thiam a si ahcun tangdornak nun in neitertu ah a cang thei. Harsatnak suaktertu ziang a si timi simfiangnak tuahter aw. Harsatnak hi nu le pa in phisinsak rero hnakin anmahte harsatnak doneh thei dingih zirhawk hi a ṭha sawn lo sawm ti ding a um phahphah thlalang. Rinsanawknak le zumawknak lungput khal nei thei dingin thapeknak thawn nunsim ding.

Hminsin: 

Nauhak hi pakhat le pakhat an bangawk lo ruangah an ruahdan le an hmuhdan khal a dang. Curuangah himi tarlangmi vek cekci rori ih zirh theih lo le sim theih lomi tla an um men thei. Hringtu nu le pa in mai’ fale pawl ih lungput le umtlandan hi a tlangpi ih theih ṭheh ding a ṭul.

Credit to: Aung Ko Latt
Lairawn Meifar
(32/2018)