FALE PAWL HNENIH NITIN SIM ṬULMI PAWL (9) (By-Lairawn Meifar)

Tui ni cu khuitawk hmun ah thaithawh na ei?

“Na pumpuar dingin rawl an  
  lo pe maw?

“Tuni teh ziang na rak ei zo?”

“Tui ni teh sayama in ca ṭha ten a lo zirh maw?”

Nauhak thinlung hi thil sia lam ih thlen theinak ṭongfang pawl hril tengteng ding.

(1) KA LO ZUM

Kan fale pawl kan kaihruai/kilkhawinak ah a thupi zetmi pakhat cu an parah nu le pa in za ah za zumnak kan nei ti hi theihter ding. Hringtu nu le pa ih zumnak/rinsannak hi fale pawl hrangah anmah le anmah zumawknak/rinsan-awknak an neihnak ding hrangih a thupi bikmi a si.

(2) NA RALṬHA
Nauhak pawl in harsatnak an do ngamnak dingah hivek ṭongkam (na ralṭha) hi an theih dingin vei tampi sim ding. Nauhak timi cu kiangkap nunkhawsaknak ziangtlukin ṭha khal sehla harsatnak a phunphun an tong lai ding. Curuangah harsatnak an do ngam theinak dingah “miralṭha an si zia” an thinlung ah za ah za zumawknak nei hai seh.

(3) TUI NI TEH ZIANG NA BANG?

Hi thusuhnak hi rualpi pakhat le pakhat thusuhawknak phunkhat a si. Fale pawl kha nu le pa hnenah an thinlung sungih ummi pawl an simphuan theinak ding hrangih lamzin tuahsaknak ṭongkam a si. An lungawinak, an hmuhtonmi le an rualpi pawl thuhla tivek hi nu le pa hnenih sim theinak caan ṭha tuahsaknak phunkhat a si.

(4) NA LAM AH KA ṬANG

“Na pa/nu ka um hokhaw. Zianghman ṭih hlah” tiih sim thawn a bang aw. Ziangtik lai caan khalah na lamah na nu/pa in ka lo dinpi/ṭanpi ringring ti simnak khal a si. Hivek ṭongkam hi nauhak pawl anmah te ralṭha zet ih thutluknak an tuah ngamnak ding hrangah a si.

(5) KA LO LUNGAWIPI

Hringtu nu le pa ih lungawipinak le lomnak hi fale pawl an ṭhansonak ding hrangih a ṭha bikmi le a cak bikmi thazang peknak phunkhat a si. Nauhak pawl hi an khawruahnak le an lungput a picang hrih lo ruangah midang ih thazang peknak le hringtu nu le pa ih lungawipinak hi an ṭul zet. Kan lungawipi le thazang kan pekdan vekin hmailam ah an ṭhanglian vivo thei.

(6) A ZATE A REMCANG MAI DING

Nauhak pawl harsatnak pakhatkhat an ton tikah thazang peknak le beidong lo dingih simnak phunkhat a si. Thuṭhimnak ah: Nauhak pakhat cu thirleng mawn a zir tikah ol ten a thiam thei lo. A netnak ahcun a beidong. A tha khal a nau mai. Culaifang caan ah “Nute/Pate, na tha thlah hrimhrim hlah.” “Nute/Pate, tuihnu rei lo te ah na mawng thiam mai ding.” “Hivek cu maw…a daan hokhaw. Thiam lo in na um cuang zik lo,” tiih sim hi hmuar a nei zet.

(7) IN BAWM IH KA LUNGAWI

Lungawi thu sim thiam dingin hringtu nu le pa in nauhak pawl kha zirh tengteng ding. Hringtu nu le pa in a tak ih kan tuah lawngah kan fale pawl khal a tak in an tuah thei ve ding. Hringtu nu le pa in lungawi thusim kan thiam cun lungawi thusim thiam fale tampi an suak ding. Thil pakhatkhat an ngah tin ten lungawi thusim thiam dingin zirh ding a si.

(8) NA SUNMANG KHA ZIANG SI TA?

Nunnak ih tumtahmi/hmuitinmi cu ziang a si? ti sim duhnak a si. Ṭhangso dingin nauhak pawl nunnak ihsin a thok rero zo. Sunmang ṭha zet nei aw. Ralṭha zet ih sunmang kan man ngam lawngah ṭhansonak lamzin thoknak kan hmu ding. Nauhak pawl ih mang hi phuahcopmi thuanthu vek tla a bang. Cun mumal lo takmi thil vek tla a bang. Ziangziang a si khalah thazang pek in, lawm aw. (A si thei lo. Thli lakah cun tlakrawh inn sak duh hlah, tin kham hrimhrim hlah uh.

(9) KA LO DUHDAWT

“Ka lo duhdawt” timi ṭongfang hi ṭong ding hrimhrim a si. Hringtu nu le pa tam sawn cun an fate hi kum (3) a kim hlanah cun “Ka lo duhdawt” timi ṭongkam hi tu-le-tu an sim. Asinan nauhak kum (3) tlunlam a si ahcun ṭongpi a si tuk lem nawn lo.

“Nute/Pate ka lo duhdawt tuk.” Himi ṭongkam tla hi a thlum zetmi le ngai nuam zetmi ṭongfang a si ruangah tu-le-tu ih sim theih ṭulmi a si.

Ref: we chat/Sayar Aung Ko Latt
Lairawn Meifar
(27/2018)