Salai Star Media: A Vei 63rd -nak Lai Phun Suah Ni (New Delhi)

Chin Student Uni

Chin Student Union (CSU) ih hohanak in le Community tinkim ih tanpinak in A vei 63rd -nak Lai Phun Suah Ni, India Khawpi, New Delhi ah a Ni February 20, 2011 (Sun) ah sunglawizet in tuah/hman a si. Laiphun Suah Ni lawm dingih a ra poktu, sunsaktu mipi hi kan tam ngaingai. New Delhi ah Chinmi mipum 10,000 lenglo kan um ih Tlawngkai, Hnatuan kan tam sawn ih a ni a ni in mipum kan pung rero. Hih Ni, Ni Thupi hrang, buainak, harsatnak, a um lo-nak dingah zumtu zate in thlacamnak nasazet in Pathian hnenah hlan a si.

CND Celebaration Committee

Pathian in kan thlacamnak a ngai ih Ni sunglawi tuah thei lo ding le Caan, Program pawl tluangten hman thei lo ding tiangin harsatnak a um lo. A ra suaktu mipi hi an phur ngaingai ih Hall sung, Hall leng mipi kan khat thepthep. Kan Laiphun Suah Ni, Ni Sunglawi ah Laimi "One In Chin" tih lungput nei in pakhat le pakhat kan cibai-awk le kan biak-awk, kan neel awk hi cu a sunglawituk. Kan hman mi tong dangdang, kan umnak khuatlang dangdang hman sehla Laimi Pumkhuat, Khrih ah pumkhat sinak hi kan neih cio ruangah hih lungput in petu hi kan Biak mi a nung Pathian a siih a hmin thangthat in um ko seh. Hih Ni sunglawi ah Lai Pardum (Chin Park) kan si ko. Kanmai' hnam-thuam tete thawn kan pok cio ih Pardum sungih pangpar phunkim an par ih a mawizet vekin tial thingthengte in kan mawi ngaingai. Culawng si lo in Hnam Lam (Cultural Dance) a phunphun, Lai Phun Suah Ni lomnak hla mawi a phunphun le Fashion Show (Community tinkim ihsin) show a siih a hlunghlaizet.

Falam Community

Khual Lian (Chief Guest) ah MLA Shri Jagdish Mukhi sawm a siih Guest of Honors ah Dr. Run Bik sawm a si. Cun CRC President Steven Ral Kap Tluang siseh, Falam Women Society Development ihsin Pi Hrang Tin Sung siseh, Pawlkom (Organization) dangdang ihsin khuallian (Kawl, Kachin, Rakhin) tiinState dang ih unaupi pawl tla in telpi thei ih a sunglawi ngaingai. Miih khua le ram ah zalenzet in mai khua le ram hnak hmanin hiti ih Laiphun Suah Ni kan hman thei hi cu... Baibal sungih Pathian tongkam... "Keimah a duhdawttu pawl le ka thu a ngai ih a thluntu pawl cu thluasuah ka pe dingih an palnak ram pohpoh cu an ram ah ka canter ding" tihi Lai mi hrangah a kim rero si lo sawm.. tiih ruah a theih. Amahbelte kan hngilh lo dingah "Israel pawl Izip ram sal an tannak ihsin an luat hnu Canaan ram pan ih an fehlai ah Pathian Thu ngai lo le Pathian a dodaltu, Pathian a riahsiatertu pawl cu a hrem ih an ci tianghman mit ko in a tuah khi kan hngilh lo a tha. Nang le kei in kan thlennak poh ah Pathian ih duhzawng thluntu, Ram le Miphun duhdawttu kan si ding hi Pathian ih duhnak a si. Mi tampi cun "Laimi pawl cu puai kan tuah le buainak kan tuah ringring ih a zahthlaktuk, curuangah Puai hi tuah lo a tha sawn, Puai ah tel ve lo sehla a tha sawn" tiin kan ti theu. Hihi khatlam ah a dik ko na'n thil dik lo tla a si thei.

Falam Community

Hivek caan ah zumtu nang le kei, ahleice in Pathian hnatuantu pawl in puai hmun ah feh in a cang theitawk in kilkhawi sawn ding a si. Puainak hmun ih Pathian ih mi le fa, Pathian hnatuan pawl an rat ve, an tel ve tikah buainak a mal ih cule mipi in Pathian kan tihzah ve ruangah a hnatuantu pawl hi Amah Pathian ai-awh in kan ruat. Cutik ah buainak kan tuah tum tikah A hnatuantu pawl hi kan tihzah ih mah le mah tla venhim-awknak ah a cang. Cuti si lo in atu vek thothoin Laimi Christian ke kan kar a si ahcun "Chin Government" a si ding hi cu a hlatuk lai tinak a si. Curuangah CCYI ih Motto an tarmi vekin "Tho Uhsila Din Saal Uh Si"! tihmi Thuhlu hi hngilh lo in Pathian rinsan in Laimi atu ihsin Tho in kan Ram Chinland hi Din Saal thlang uhsi!