VIETNAM TLAWNG SAYA/MA PAWL IH AN SUH RINGRINGMI PAWL

Vietnam ram ih tlawng saya/sayama pawl ih ca zirhdan hi theih tlak le cawn tlak zetmi pakhat a si. Tlawngta pawl hi nikhat ah inn ih tuah dingmi (homework) panga an fial ringring. An tuahtermi cu nitin thusuhnak hi a hnuailam vekin an nei.

(1) Tui ni inn ah na nu le pa kha ziang hnaṭuan na bawm?

(2) Tui ni ah midang parah ziangvek/ziangtin ṭhatnak na tuah?

(3) Nan inn ah kiangkap thuhla thawn pehpar in ziangmi 

thuṭha an rel?

(4) Kan ram sungah ziangvek thlengawknak le ṭhansonak thuhla na thei?

(5) Leitlun ah a thleng awmi le a ṭhangsomi ziang a um?

Himi thusuhnak panga an suhmi parah “Ziangmi si nangmah ah na hmuhsuakmi a um maw?” ti hi an sut bet ṭheu. 

Saya/sayama pawl in hitiih an suhnak ihsin tlawngta pawl hnenih an zirh duhmi tampi a um. Cupawl cu:

(1) Fale pawl hi an nauhak lai ihsin hringtu nu le pa bom duhnak lungput an neih theinak dingah le inn lam ih hnaṭuan an ṭuan paihnak dingah a si. 

(2) Nitin ṭhatnak tuah dingah le miṭha si thei dingih zirhnak a si. Cun duhdawtnak le zawnruahnak lungput thawn midang bom duhnak lungput an neih theinak dingah a si.

(3) Nauhak pawl hi mah thawn a pehparmi kiangkap thuhla an theih duh theinak dingah le zingzoi duhnak thinlung an neih theinak dingah a si.

(4) An ram sungah ziangvek thlengawknak le ṭhansonak a um ti thuthang theih hiar duhnak an neih theinak dingah a si. Cun mah le mah nitin UPDATE an tuahawk thiamnak dingah a si.

(5) Panganak thusuhnak ih tumtahmi cu: Nauhak pawl in sunmang (vision) an neih theinak dingah a si. Leitlunpi hi ziangvek dinhmun ah a um, ziangtluk a ṭhangso ti hi santiluan thlun ih an theih theinak dingah a si.

Hitiih an zirh tikah ziangkim hi a cekci ih cawn thluh dingin an fial lo. Cuhnakin nauhak pawl in khawruah thiamnak an neih theinak ding duhsaknak thawn kaihruai ih zirh rero a si sawn. Khawruah thiamnak in ṭhansonak le thlengawknak a suahpi. Curuangah nauhak pawl hi anmai’ ruah tawkte le hmuh ban tawkte parah nitin thusuhnak kan tuah thei a si ahcun kum (3), kum (5), kum (7)…kum (10), tui hnu kum (20) a rei ahcun tui ni ih nauhak pawl hi ziangtlukin an ṭhangso ding ti hi ruah tlak zet pakhat a si.

Hram: Lawkanite Thuta Sarpay
Lairawn Meifar
(40/2018)