PICASSO LE RUKRU (In nautattu pawl parih nehnak co theinak cu ZUAMNAK a si) By-Lairawn Meifar

Veikhat lai ah zuksuai paih zet minote pakhat a um. Zuksuai thiam dang pawl vekin hminthang le thiam zet a si lo. Asinan zuksuai paih zet a si ruangah a inn ahcun zuksuai in pumcawmnak a hawl ve.

Nikhat cu milian zet pakhat ih nupi cu minote ih inn hmai a feh phah ah zuksuakmi pawl a hmu ih mawi a ti tuk. Cutin minote hnenah, “Ka zuk in suaisak aw,” tin milianpai’ nupi in a fial. Zuksuai man cu Ks.10000 a si.

Zarh khat a rei tikah milianpai’ nupi cu a suaitermi zuk tlen/la dingin a feh ih zuk a tlen hlanah a thinlung sungah hitin thu a ruat: “Himi zuk hi keimai’ zuk a si. Tlen lo in ka um sehla zohman in an lei/tlen cuang lo ding. Zuksuaitu hi hminthang le thiam zet tla a si lo. A suai man khal tampi ka ṭhumter ding.”

Zuksuaitu hnenah milianpai’ nupi in, “Zuksuai man na dilmi a tam tuk. Curuangah na suaimi ka zuk hi suai man a hrek tal i ṭhum lo ahcun ka tlen lo ding,” a ti tikah minote cun mak a ti nasa ih, “Suai man ka ṭhum thei lo. A hlanih kan rel vek si ko,” tin milianpai’ nupi hnenah a sim.

Cutikah milianpai’ nupi in, “Suai man hrek in ṭhum lawngah ka tlen ding. Na lungkim lo asile na suaimi ka zuk hi ka tlen lo ding. In tlenter ding maw, tlenter lo ding. Na thu si ko,” a ti ih minote khal cun, “Suai man ka ṭhum thei lo. Ka lo tlenter thei lo. In nautat ruangah si. Ka duh ve ce lo. Tui ni cu nang hi thukam parih ding ngam lotu na si. Rak zoh aw. Tui hnuah himi zuksuaimi hi a let kul (20) in na lei leh tengteng ding,” a ti.

Milianpai’ nupi cun, “Ha..ha..ha..A ngah tuk. A let kul (20) in ti aw. Hivek zuksuaimi men a let kul ih lei ding tiang cun ka aa lo hrih lo hokhaw aw,” a ti ih minote in, “A ṭha. Kan zoh phot pei cu,” a ti.

Tikcu caan a herliam vivo ih zuksuai paih minote khal cu zuksuai thiam zet pakhat hnenah nasatak in a zir bet. Kum (10) sungah zuksuai khawvel ih leitlun hminthang pakhat ah a cang.

Nikhat cu milianpai’ nupi kha a rualpi pawl in thu lamdang zet pakhat an sim: “Thu lamdang tuk kan lo sim ding. Kan dung ah zuksuai thiam zet pakhat ih suaimi zuk pawl zohnak ah kan feh. Zuk pakhat hi a man a khung tuk. Cuih zuk cu nangmah thawn an bangaw tuk. A man cu ting hnih (Ks.200000) si. A danglamnak le hnihsuakza pakhat cu zuksuaimi hmin kha “Rukru” ti a si,” tin an sim.

Cutikah milianpai’ nupi cu a khawruah a har. A liam cia kum hra lai ih thil cangmi pawl a vun mang cupcosal. A sinak le lungput parih tahfung hmanmi zuksuai a si. Curuangah a zamrang thei bik in zuksuai thiampa hnenah a feh ih ngaidam a dil hnuah cuih zuksuaimi cu Ks.200000 in a lei cih.

Zuksuai thiampa ih thinlung le beidong lo ih a zuamnak lungput cu milianpai’ nupi parah nehnak laknak ah a cang. Cuih minote zuksuai thiampa cu zo dang a rak si lo; leitlun ah zuksuai khawvel ih hminthannak le hminṭhatnak ngahtu Picasso a si.

Leitlun ah in hmuhsuamtu/nautattu pawl parih nehnak kan co theinak ding lamzin um sun cu beidong lo ih zuamnak a si.

Hram: Lawkanite Thuta Sarpay/Nine Nine Sa Nay
Lairawn Meifar
(30/2018)